الأحد، 27 ديسمبر 2009

لحظاتك الأخيرة


بوصل دايما ف لحظاتك الأخيرة
و أرفض دايما أني أشوفك مثيرة
وأحب شعرك ديل حصان مش ضفيرة
بكتب ليكي دايما ف آخر الليل
أما تخلص كل الاحلام
و أكرهك أوي وانتي عاملة أميرة
بعشق فيكي الانجراف و آذي الاعتراف
بس خوفي مش بيخاف
من نورك ولا من عبيرك
ولا همس سحرك و تأثيرك
انا ضعيف ف الانفعال
مرتد عن وصفك مرتد عن همسك
يمكن أموت من الاقتراب
ومين مامتش من قربك
أجمل الاشياء ف نهايتها
وانتى الاجمل في كل نهاية شوفتها
دايما بتألمني بس بكون من الاول ألمتها
هدوءك ف النهاية من جمالك
بتوشوشيني ف الحكاية
تضليني ساعات و تهديني
انا هنا ف المقام
اللي فالت من الزحام
وانا مهما ألف ادور
و أجد ف التوهان
ومهما أبتعد أنا بأقترب
ولما أوصل إليكي أغترب
ف الدوران أحوال و أشكال
كلام منمق
ياما صبري هزني وياما صبرك هدنى
بعشقك لاني مش بطولك
زهدي فيا اللي باقي ليكي
ف لحظاتك الأخيرة بتبقي ساحرة
وساعات أميرة
أيه يعني حجابي مكشوف
ما أنتي مكشوفالي
بس ف النهاية مرين
مر أنك صبرت
ومر أني اليك ما وصلت
محمد عطية 27/12/2009

الثلاثاء، 15 ديسمبر 2009

سؤال


محتاج أليك
لأول مرة بكتب ده
و لأول مر بحس بكده
أنت سافرت ولا هاجرت
و لا أنت طيف
ولا أنت مجتش من الأساس
ف الأصل أنا عايش ف حالة ضياع
بيك كملت لكن ما أكتملت
بعدك عشقنى الانقطاع
ولا عمري سبت جواك أنطباع
سبيلي مش مفرود ورد
ولا هو متحنيلي
ليك آجد بس أعرف
ليه وحدك شربت من نيلي
الوحدة وحدة لأنها مبتتقسمش
مرة ف الطعم
قاسية ف الوهم
بتضعف تذل و ترفض تدل
مقدرش أثابر أنا من غيرك
دلنى على مقامك و أجيلك
ف كل الاوقات والأمكنة
يا ترابي اللي ف قدميك
ينورني نورك جوايا جواك
يضل فيا زي ما يشاء
انا كلى و وحدي ليك بدون أتفاق
بدون مواعظ ولا حكم و لا أشتياق
سرابك قشور ودوري أجمعها
مخفي ف در ف زمرد أو حتى ف زبرجد
عمري ما أبقي زي جن سليمان
ولو بعد حين أفكر أتمرد
ثوابي ف عقابك
وجودي بيضوي عند حد بابك
أنتهى و أسترد
تلاميم وجودك
و أجهز نفسي لتباجيل حضورك
بس أنت فين
لو اشوفك ف غمض العين
بس مشكلتك أنك
ملكش تباشير
ونشوزك بيحد عن المألوف
وتبكي و أبكي و تضحك و أبكي
ف كل الظروف
و ارجع أسترد نفسي لما أطوف
ومقدرش أفتح عين و أشوف
بس أنت فين
مشكلتك أنك ملكش أوقات
يقولو عنك عدى يقولو عنك فات
سامحهم جهلة ميعرفوش
انا وحدى أعرف بس أجهل الجميع
جوايا مجوف جهري بيخوف
وسري كسير
وليه مصر تبقي زي أمشير
زعابيبك تلطف وترجع تقطف
شجر الجميع و ورق الربيع
بس انت فين
سرابي سرابك وشهدي ترابك
لفيت روحي حواليك عقال
وبرضه عندي نفس السؤال
مفيش حكمة ف عدم وجودك
بس ميمنعش انه في سنس جمال
حتى لو فاق الحد
حتى لو فاق الأحتمال
وأرجع اسال
بس أنت فين
هى دايرة واحدة مش دايرتين
خروجى منها بجد محال
و اسأل تاني
بس أنت فين
مع أن الاجابة موجودة ف السؤال
محمد عطية

15/12/2009

الاثنين، 7 ديسمبر 2009

ماريونيت


مش عارف أدرك أيه الصالح
مني ليكي
ولا قادر أحط قلبي بين أيديكي
أنا زي العروسة الماريونيت
مهما تروح منك تيجيكي
حبالي ف صوابعك
مفيش ف أرادتى
حاجة عكس أرادتك
حاجة واحدة بس
مش ف أستطاعتك
أنك تخليني أحبك
بشتاق للمس الأيد تلمسيني
و أشتاق للهمس الدافي الحنين تهمسيلي
ولما ابعد وتتوحشيني تنديهلي
أرجع أليكي أتوه ف عنيكي
بس مقدرش أقولها بحبك
يمكن أفعالي تدل
يمكن ف حضنك بحس بالدفا
بس بحس برضك بالذل
هي حاجة غريبة
يكونلى ف حضنك مكان
شوفتي حد بيشتاق للحنان من الحنان
يشتاق بعد هدايتك للضل و التوهان
انا شئ معقد منتشي على طول
عمري ما حبيت زي الأصول
ترياقي من سمي
بس عليا أنا
مالوش مفعول
تصرحيلي بالعوزة و طلب الدفا
أحتياجك للحب اللي أختفى
متعرفيش أنك بتكلمي تلاتة جوايا
واحد أنا لا أعرفه ولا أنتي تعرفيه
والتاني ملاك جوايا أنتي بتحبيه
وتالتهم شيطان جوايا
لا أنتي شوفتيه ولا أنتى بتكرهيه
الغريب ان اللي الأخير هو اللي حبك
بس أنتي مش عارفة أنتي بتحبي مين
بس هو شاطر ف غزل العلاقات
ميهموش أيه اللي فات
ميهموش مين اللي يحيا
ومين اللي مات
و جاهين قالها زمان
ورا كل شباك ألف عين مفتوحين
و انا وانتي ماشيين يا غرامي الحزين
لو التصقنا نموت بضربة حجر
و لوافترقنا نموت متحسرين
عجبي !!!
محمد عطية
07/12/2009

(الخط المائل من رباعيات صلاح جاهين)

الأحد، 6 ديسمبر 2009

ف قربك



ليه بتعاملني معاملة الند للند
وليه بتعاملني اكن الدنيا
مفيهاش ود
ايه يستاهل تجرحنى ليه
وكل حاجة ابنيهالك تتقتل تتهد
وانا بين آقدامك عبدك وخدامك
بعشق الرمل اللي بتدوسي عليه
انا مش جبان
أنا زي حصان من غير لا سرج
ولا لجام
بس أنتي سجانى
طوقى ونسيانى
من غرز ف قلبي حبك
وحده برحمته يقدر يداويني
ليه كل حاجة بحسها
بعيد عنك جميلة
ف قربك بتبقي مستحيلة
ومالهاش طعم
بتبقي وهم
ف قربك بتبقي نار
بحس أنى عاجز
مع أني ف الاصل مش كده
بحس أنى طيب زيادة عن اللزوم
وليه ضحكك بيبقي فوق العادى
مع أنى محموم ليه كلامك الحلو
اللي عارف أنه مش ليا
بيخليني احس أني مسموم
أنا مش ضعيف
ولا شئ طريف
ومش عاجز
بس كل الحكاية أني ف قربك
قليل الحيلة أحساسي معدوم
متخدر و متكدر
كياني كله مش بيتقدر
مع أني بغزلك الورد
وأبنيلك من قصوري تيجان فل
في بعادك عني بنكوي بنار فراقك
وف قربك بنكوي بنار كلامك
ببكي لأني سلمتلك
وأبكي أكتر لأني سلمتني
بقيت حاجة بتطوي
ملاذي ملاذك
أكونلك عرق بيضخ في فؤادك
من ضمن العروق
آستحالة أني اضمن أني اكمل حيا
وأنا معاكي
أني اضمن الدفا ولا الونس
بس قدري كده
أني ف قربك ابقي كده
منتهي ف الضل مش كامل
أحترق لما أقرب
و أحترق لما أبعد
بتوه ملامحي وتبدأ تدوب
بحسي ان جالي اوان الغروب
وف قربك بأنسي كل الدروب
اه لما القرب يجرح ويكوي
و ف قربك أنتي تنجرح كل القلوب
محمد عطية
06/12/2009

الثلاثاء، 24 نوفمبر 2009

كسر القلب



لأن خيال الأعمى
مش دايما أعمى زي صاحبه
و لأن العود ده موجود دايما هنا
وأنا من غير ايدين
فمش هاعزفلك
غير بقلبي اللى بتشتهي أنك تكسريه
تفتيتيه زي حب السكر
وتستطعميه
أو أقولك هاعزفلك احلى بالناي
اللي بيوجع قلبي أكتر
انا هاروح منك فين
انا هنا ليكي
وانتى هنا لكل الناس الا أنا
معملتش ليكي حاجة خالص
بس ده قدري
ومحدش بيهرب من القدر
قدري انك تعتقي حبي زي الخمر
وتسقيه لغيري
مش هاقدر ألحن لغيرك
وانتي عارفة وانا عارف
أن صمتي أبلغ من كلامي
وأن اللي بيقتلني سلامي
وحدي اللي نجيت
بس من غير عيون
ما أنفعش صح
لاجل كده بعزف
وانا مكسور القلب
مفيش منك كلمة تطيب الخاطر
مفيش منك صقفة
او كلمة برافو شاطر
العمى مش ف العين صدقيني
العمى عمى القلب
الكسر مش كسر الجبين
الكسر كسر القلب
عودي بيقول اللي انا عاوز اقوله
و بيطول اللي انا مش بطوله
كفاية أنك ساعات بتحضنيه
بتدلعيه بتقوليله صاحبك أعمي مش زيك
وأنا بفرح لده
بس عودي مبيجرحش
مبيفرحش
عايش لأنه مش شايف زي
لا هو شايف وساكت
قلبه مش مكسور زي صاحبه
وليه عينين
مقدمهموش ليكي هدية
لحد استحقهم وباع
لحد وشمني على الدراع
لحد أشتهيته ف الخيال
100 مرة
واشتهاني ف الحقيقة
ولا مرة
مش بسأل ليه بتعمل كده
كل اللي بطلبه
خلى بالك من عيوني
خلى بالك من عودي
اللي لبعدي هيبقي عودك
مش هيعزف لحد غيرك
مش هيبكي لحد غيرك
هو مش أعمى هو شايف
وخيالي شايف
الاتنين في الوجود حبوكي
و ف الخيال حبوكي
عشان كده بقولك محدش يلمس عودي غيرك
و محدش يبص لعيوني اللي ف عيونك
غيرك

محمد عطية
24/11/2009

الأربعاء، 18 نوفمبر 2009

متخافش




مش عارف ليه خايف
مع أنى مطمن بجد لوجودي
ليه مش قادر أحدد
مع أنى بجد شايف
وليه نور شمعة واحدة
مبينورش غير لأتنين
محدش بيحزن علطول
ومحدش بيضحك علطول
ومفيش حد بيبكي لأخر العمر
وأكيد مش طول عمري
هافضل قابض ع الجمر
اللي بيمر بيمر
مفيش حاجة بتفضل ومفيش حاجة بتجر
أسعد شيء لما تفرح شوية
تحزن شوية
يبقي ليك يا سيدي هوية
متفضلش ف الممر
متفضلش هربان من حاجة لحاجة
مش لزماك
هي الوحدة حاجة مقوياك
أرفض تكون علطول جميل
متوافقش تكون لنفسك دايما دليل
توه يومين ده التوهان لذيذ
و أظهر الحاجات اللى حابب تخفيها
الحاجات الى نفسك أنك تداريها
و أخفى حاجاتك اللى حابب
أنك تظهرها و لغيرك توريها
تعرف تجرب تكون أسطورة ومش اسطورة
أنت مش بجعة جوا نافورة
أنت حاجة أهم أو حاجة أقل
تكون زي ما تكون
بس متقلقش متندهش
متفرحش متحزنش
والأهم أنك بجد متخافش
أنا مش بساندك أنت مش ضعيف
ومش قوي
عيش بس متعيش أوي
جرب تموت و متندفنيش
جرب أسرع حاجة لأجل تعرف
أن البطء حلو
أنت مش ممل
ودايما ف حل غير الهرب
ومتقلقش أنك قلقت
لان القلق شيء طبيعي
ايه أسوء من حياة زيها زي الموت
انك تخاف و الخوف ده مالوش صوت
صدقني كل حاجة ف الدنيا بتعدي و بتفوت
وكل حاجة بتموت
بس عمرك شوفت موت بيموت
يبقي ليه تخاف
محمد عطية
18/11/2009

السبت، 14 نوفمبر 2009

اوفردوز



لو تتمني ان السحر
ده كله يبقي ملكك
يبقي ليه القلق و التبدد والملل
والدعا ساعة المطر
ما انت عارف أني بحبك أنا
مدمن عليك مدمن على القسي
وليه النسى واللي أتنسي
وخضة الضلمة وسط النور
والخوف أكنك وسط بحور
او طائر ف لوحة لفان جوخ
أنت مش عصفور ف ليلة برد
اللي حصلك انو انا
دفاك أنا و هنَاك أنا
سعدي سعدك
اتفاءل أنا هنا ليك
محدش هيمسح على جبينك غير أيديا
محدش هيداري عيوبك غير عينيا
لاجل عينيك
مرادك والجنى اللي بين أيديك
يبقي ليه القلق
و الغص اللي بتشرخ الجبين
يا حبيبي ده أنت انا
النجوم اللي ف السما
مبقولش نفسك تملكني
لأنك مالكنى من مليون سنة
أنا أنكتبت لك ف الكتاب
نصيبي من نصيبك
متتوجعش وحدك متتألمش وحدك
و الجرح اللي يصيبني يصيبك
بحبك متقلقش بحبك متنفعلش
عشان خدودك متوردش أكتر من كده
سلامي من سلامك يا دوختى من كلامك
بحب فيك هيامك
يا انسجامى ف انسجامك
زي نسيج خيط نسجهولي
او بوكيه ورد جيبهولى
غمض عينيك
يا لمس الحنان اللي بأيديك
لو تعرف بشوف أيه وأنت مغمض عيونك
وألم لك شعرك على جبينك
أنت مدهش مزعج ليا
بس مقدرش
مقدرش أشوفك محسش أني مش أنا
فبحق فردة شعرك على كتافي
لو موتي هو خلاصي
وبحق نوم عيونك ف عيونى
أنا مستعد
مش مستبد
بس خلى أخر حاجة أشوفها أنت
وأخر حاجة ألمسها أنت
و أغمض عيوني و أموت
وتحييني أنت
لأن أنت صاحب السحر
و صاحب الأمر وصاحب النهي
محمد عطية
14/11/2009

الاثنين، 9 نوفمبر 2009

جوا العروق



لما بفكر أن أسمك ف تنى الحروف
و ف حضنك بوشوش جنانى
بسلم ليا ليكي
بخبي عليكي كل الوشوش
يمينك يميني
وسرابك وتيري
بتكسف أما بشوف عيونك
بحب أشوفك من غير نور
سحرك ف الضلام أكنه
بوبوء قط شيرازي ف لون الكريستال
يمكن حتة من الخيال
بيضوي العيون ويكوي الجفون
و ف السلام سر الختام
و ف السكات سر الكلام
وريدي ف أيديك
وريدك ف أيدي
تملى ينجلى عني الخشوع
ف زفة حضورك
تملى ينورني من جوايا نورك
تملى أمنى نفسي مرة انى أنولك
أنا أعرف أن الدلال لونه أحمر أو أزرق
حسب الحالات
مفيش حد كمل لمجري العيون وعاش
ومكنتش أعرف أن تسنيم ده نهر
و أديني عرفت و برضك عشقت وبرضك غرقت
يا روعة محلها منى أنها تمزعنى
مش بقول أنى بحبك فوق الوصف
يا أم الدلال درجات
سبلي اليكي متلونة بالأحمر زي الدم
بايه يفيد التيه و الحرمان
وأنتى عسلك قدامى محروم أنا منه
ليه ملايكتك مش راضيين يستنوا
مكنش قدامى حل غير أنى ليكي أهج
ليكي أفر
يا طعم الحاجات وهي من جنبك تمر
وأيه غيري ليكي مستنياه يهل
يشهد عليا عفار التراب اللي عليه كنت بمر
يشهد عليا صمت السنين
و الحاجات اللى تحَزن ترجع تسر
أشوفك ف لحظة أشوفك ف ثانية
أشوفك مرة واحدة ولو ف العمر
يندهلى أنده يصرخلى و أرجع
نفسي بس أسمع
أقول بس أيه
أقول أيه و أيه
لما جوا العروق أسمك بيجري
لما مراكبي قلبي بييجي لحد عندك
ويرجع يعاندني
ببتسم و أسكت لأن أنتي جوايا
عايشة معايا زوادك هوايا
عرفتي بقي انتي مكانك فين
وعرفتي كمان مكاني انا فين
متنتدهشيش لما أسكت وأرد عليكي من غير أنفعال
متندهشيش لما فراقك يزيد الوصال
فسبحان من خلقني للسكات
وخلقك يا ستي تنزرعي جوايا
في عروقي تصبي جواها الدلال
محمد عطية
09/11/2009

الأربعاء، 4 نوفمبر 2009

أولسايز



سامحنى لأنى معرفش غير أني أحبك
ف ودك و هجرك ف نارك و بردك
أنا اللى بدَل أنا على الطريق
بهديك زهرية مني من وردي
بهديك شوية من ضلي
بحبك في كل الحالات
معاك معرفش الندم
معرفش معنى للألم
مفتكرش أن هجرك بيكويني
بحب فيك الغموض
لونك بيحير عيونى
يا تري بحب المطر علشانك
ولا بحب الشمع علشانى
ما أحنا كلنا بنبكي لأجل نسعدك
لأجل تسكنا ونسكنك
مع أن أنتى ف الأصل ساكنانى
بتحب الروح المغسولة بإتقان
بتحب الشمع بإحجام
والمطر لما ينزل بإحكام
للجمال مآسي متمثلة فيكي
بس برضك بحبك ف كل الحالات
بستني كتير تيجي مبتجيش
بستناكي تحزني زيي
بس مبتحزنيش
حتى لو بحبك وأنتى لا
أنا قلبي أولسايز
واسع على ضيق
ليك حابب الونس
بأنسي الضي ف عيونك
بأنسي الوجع ف جفونك
يا أم الليالي الضي
والشعر مفرود ع الجبين
أنا قلبي ليكي بيغفر
حتى من غير دليل
مهما تعملي فيه
حتى من غير كلام
لأنى أنعكاسك و التماسك
لو بطول الشط هاجيلك
ولو حتى زاد الصبر أنا صابر
أنا كتبت كتير ومش عاوز أنهى
بس ف الآخر ف رسالة ليكي منى
ف القصر الابيض واحد بس مستني
صابر وحيد و بيغنى
الشمع حواليه كل القطع
و المطر حواليه بيرشرش و الندى
وستايرك جوا قلبه بترفرف وبتطير
و بعوده بيغني أغنية غناها منير
أنا قلبي برج حمام هج الحمام منه
وحدي للشمع والمطر بأقولهم يستنوا
ياللي عينيك كلام ليه الضلوع أنوا
مش قلت لك
انا قلبي لك سواح
فسامحنى بقلبي ومن قلبي معرفش
غير انى أحبك
محمد عطية
04/11/2009

(The Bold Words from mohamed mounier song Borg Hamam)

الاثنين، 2 نوفمبر 2009

مفضلش




مفضلش غير الملام
وكلمتين والسلام
والنده جوه الروح
وراك فين ما تروح
متظنش ان الغلا بجد غالى
الا لما تشوفه كده
متستناش تحب ويايا
انا الحزين أوقات السعيد أوقات
الشيطان بس بجنحات
يفيدك الفرو ف الحر ولا يقيدك
بأيه يفيدك الحنان ف كلامى
مدام مش ليك
أنا أعرف غيرك كتير
وبحب غيرك كتير
أيه مبتحبيش كلامى
انا مش منزل من السما
مش خير أوى زي ما أنت فاكر
لا غلبان أوى
بس يمكن اكون شوية فاجر
أنا مش مخلوق من نار ولا فخار
أنا مخلوق زيك من طين
مش من صلصال
مليش أجنحة
ولا تكويني يسمحلى
أنى أكدب عليك
أكويك أضل فيك
أنكسك
مش أنا الحصان اللى أنت مستنيه
كلامي بيضايق مش زي الخمر
مبينسيش زي ما انت وصفت
زيه زي الجمر
ولا هو كلام مقدس
لأنى مش نبي
و زمن الانبياء خلاص انتهى
مش فلسفة أنى مش ليك
ولا حتى بحاول أنى أهديك
أيه تظن يحصل
لو أنت مت
أو أنا أتقتلت
أنت أو أنا مش هننهد
مش ده الشرخ اللي هيدمر السد
لأني مشوفتش حد بيموت ورا حد
كلامي مش تزويق
ولا كلام واحد غريق
أنت لو بردان
قولتلك مش حضني اللي هيدفيك
ولا حنية من قلبي هاديك
لانه بجد جوه قلبي
حنان وحب ليك
مفضلش

محمد عطية
02/11/2009

الأحد، 1 نوفمبر 2009

أرتباك



رغم المثول والتهويل
و أن هودج غنايا لسه مجاش
وغنايا يرويكي و يغنيكي
بجد مش مستحمل
القرب قرَب بس أنتي بعيد
الصدفة نفسها فيكي
والدم اللي ف الوريد
وانا دايب
فيكي مبكتملش بس ببتسم
جواكى روحى تنقسم
ومن الوانك أتخط و أترسم
يا أم الدلال و الانفعال
السر ف التكوين أن شعري
مبينكتبش غير ليكي
فكرت أني استرد روحى منك
يا منايا
بس شايف ان كده أحسن كده أجمل
أيه أجمل منك وانت بتغنيلي
وف حلمى عيون القلب
تاخديني ف حضنك الدافى
وشعرك مفرود على كتافي
يا أم شال أبيض متعصبة بيه
و أم خلخال وردي
أموت و أبقي أنا من ورده
أو أنه يضيع منك وأنا الاقيه
بثبات وانتي بترقصي
مدوخيش مني وأنتي بتهمسي
مش ناوي ان أكون لك ملاك
ولا انا رافض للهلاك
يا سحر مستخبي ف العيون
ليه قلبي بيتنفض لما أشوفك
و أنتي شايفة كده
ليه مش بتشوفيني وانا شايفك زي الضي
يا عنبر روحي مسكك زاد وغطى
بجد غناكي فاق الحد
يا أم الصيف زهر و زمهرير و سلسبيل وعيدان ريحان
علموني عينيكي معنى الارتباك
محمد عطية
31/10/2009

الثلاثاء، 20 أكتوبر 2009

ملاك


انا انتهيت
معدش فيا طاقة للفصال
ولا عاد ف روحى لذة للوصال
أو للانكسار
أو حتى لدوق الذل ف الاطراف
ولا حتى رجفة أنى ف بعادك هاخاف
هافرح للوحدة و أبص ف الطل
كرهت نفسي وكرهت ليك الضل
كرهت شكل الحقيقة و الغرام
حبيت الندم
بس لا لقيته منك وجع والتباس
بيجري زي الدم ف العروق
يمكن كرهت وصفك آنى ملاك
ليك فعلا حابب الهلاك
الشؤم الألم
سدالى مفرود قدامك
يمكن يعقلك
مفيش ليا خلاص أجنحة
مفضلش غيري من المدبحة
ألضم من زمردي سبحة
أهى تنفعك
هى صحيح مش عقيق و لا كهرمان
بس تنفعك أكيد بعد الفراق
مفيش ملايكة تانى تجرحها
لان الدور انتهي
مفيش غير شيطانك اللى بيكرهني
وملايكتى اللي انت بتكرهها
بس خلاص انا معدتش انفع ملاك
بعد اما ليك نورت الضلمة جواك
اللي بعلم ربنا أمر متنورش
انت منتهتيش انا اللي انتهيت
أسيبك تسبح ف ضل أوهامك
أسيبك وانت سيد شيطانك
صلاتك أذي ورحمتك قسوة
حنانك غدر وعذابي لك نشوة
وانا مستهلش منك كده
ومستهلش أني أبقي ملاك
محمد عطية
19/10/2009

الاثنين، 5 أكتوبر 2009

آمر من السحر


شايلك حمل جوايا
آمر من السحر آمر ما ف العمر
صعب اتخلى عنك
و روحي مدقوقة وتد فيكي
يا روعة شبكاني ووخداني للغرام والضل
حبك زي كرهك بيزيد لما بيقل
يا صورة انا لونها وأميرة انا عيونها
مخلياني للغدر ليه أختار رغم انه مر
عمر عدى على غرز سكاكينك
لون مشربيتك أحمر من دمي
وأيديكي لسه مزهزهة وردي
أستحالة يكون ندايا جف جواكي
أو كلامي الحلو يكون مش ليكي
يا بدعة متفصلة
آه بيخليني أتنفض
لما يجي مسك روحك
عنبره روز ف عيوني
ليه تسأليني على حاجة معرفهاش
انا مشوفتش الجنة أنتي شوفتيها ؟؟؟
ولو شوفتها ما أنا معرفهاش
معرفش غير دنيتي تايه ف حواريها
يا ام البساط معقودله 100 عقدة
والبرد يجلد فيا وانا بعيد
بس برغم التيه انا لسه أمير
برغم أن ف شعرك بقايا تاجي
ورغم الوله أنا لسه أنا
برغم أن ف أيديكي بقايا تكويني
اللحن مشدود على آخره
وانا ف حضن تعاويذك
تندهني من الشوك للورد حناياكي
وترجع تألمني من الوريد
يا ام الشعور الزين
وانا وحدي مستني
يا أم أسم مكتوبلي على البردي
من فضلك أمسحي فيا بواقي تراتيلك
بس بلاش غدر بلاش هجر
بلاش تكويني و بناري
بلاش تسحريلي ف صيامي
وبلاش تفكرني بيك ف بعدك
لأني ببكي وأتالم قوي
بفتكر غناكي وشرودي
دلعك زي القط الشيرازي
وبقايا نار مولعة ف عينيه
ومخالبه علامها احمر ف ضهري
يمكن سبيلي إليكي مختوم
خني غير خنك مع أنك تشبهلي
بس أنت أكتر ف الحب و الغدر
حبتني أكتر ما انا حبيتك
وخدت منك اكتر ما أنا اديتك
بس ليه تصرخ وانت بتدبحني
مش عاوزني على الاقل انفعل واصرحلك
أن أنت آمر من السحر
آمر من الحلو
آمر من الصبر
آمر من الحب
آمر من الحزن
ده حتى أنت آمر من المر
محمد عطية
05/10/2009

الخميس، 24 سبتمبر 2009

يا رب


يا رب أديني لاجل اعيش
طيب خلاص أشتغل متقولش لا
أشتغل قواد بيع خمر بيع نفسك
متقولش حرام أنت مش أمام
متظنش أن ربنا بيعاند فيك
ولا ان الشيطان مصطفيك
طول ما انت عاوز تعيش أرضي بالمكتوب
أوعاك تعيش مقلوب
متظنش أنك خير
ومجك عليه شفايف ورسم قلوب
وانت حاطط خلفية للاب توبك
صورة بنت عريانة
وانت بتحب صوت جبريل
وهو بيقري قرآن
ليه الغلط ف المضمون
لما الدنيا تقبضك وتفكر
تقبض انت عليها
لما نور عينيك
ينور لغيرك
لما تتوزع حتت
لما تعمل خير ف مجمله
يكون ناعم مخمله
يطفي نارك ونورك
تتمني ان حد يخونك
تتمني انك تعوز
تتمني ان الحرام ليك يجوز
وان هادي ف السبيل
مع ان أنت مش سوي
وطريقك كتير ملتوي
يا رب ان كنت بعصي
فبرحمتك قادر تردني
وبرحمتك قادر تضلني
ومش معايا ولا في حياتي
هاقول غير يا رب
محمد عطية
24/09/2009

الأربعاء، 23 سبتمبر 2009

لو


لو الحب كان بالزرع
كنت زرعت حبك ف قلبي
وشيلت حبها مني
كنت هديت جسوري ليها
ونويت ليكي نية خير
كنت طلقت من جوايا الطير
حبيتها وما قصرت
وانت ما أتغيرت
لأمتي للحنان مني تطلب
ولأمتي ليها انا اهرب
انا في حضنها وانتي ف حضني
يبل خدها دمعي يبل دمعك خدي
أبكي من عوزتك ليا
بس ف أيدي أيه أقدمه ليكي
غير كلمة حلوة
أضحك
وأنتي ف عياطك أصبرك
أضايقك ساعات زي ما هيا بتضايقني
تتمني أيه مني
دايما تقولي مش بأقولك حبني
بس متكرهنيش
مش باقولك قويني
تاخدني ف حضنك تدفيني
بس متكسرنيش
بطلب منها نفس الكلام
تحكم عليا بنفس كل شيء
هو البحر بيزيد لما يزيد المطر
يا بحري انا فيكي غرقان
ممكن ان اموت جواه عطش
بس أزاي اطلب منها ترويني
وانتي دايما بتديني
كلامي مش منمق
ده صريح بيوجع
للحب من القلب يقلع
لعبك ف شعري
وبوسك عينيا
معدش فارق هيا كوياني بنار عينيها
سايب سمها يجري ف عروقي
زي ما انا جاري ف دمك
يهون عليا أيه ويهون ليه
ما انا مش ليكي
وهيا مش ليا
بلاش ندم
بتبصيلي أه من غير بكا
لكن عيونك بتفضح المكنون
فساتينك و الوانها
مسكك ورمشك
عارفين انتي مخبية أيه
أه لما ينحسر ف القلب حبك
واتوجع يطلع مع الاهات صورتك
لو كان ليا ف الدنيا أمل
بجد مكنتش اعرف أعمل بيه أيه
بس بجد كنت هاتمني
؟؟؟؟؟؟؟؟؟؟؟؟؟؟
محمد عطية
23/09/2009

أستسمحك


هي الأمارة الواضحة جدا
أن قلبي بين ايديكي
وريدي صابغ شفايفك باللون الروز
بتديني وتاخدي مني من غير ما أعوز
أيه لزوم الدلع ما دام الحب نافد
أيه لزومي وياكي
وانا مسواش ومبهداش
نفسي أعرف سر تكوينك يكون ايه
أيه لزوم الدمع اللي بروي بيه صحاريكي
انا بني ادم مش جبان
مش لوح تلج ولا بهلوان
مش نفسي أطول الجنة
ولا حتى أني أتوه ف حواريكي
نفسي أسكن جواكي
أشم صوتك واسمع جدايل شعرك
بتقول فيا شعر
آه لما بتقولي عليا جميل
يا ست الحسن
أو لما بتحبي فيا عيوني
بتجنن يا ست البنات وانا مش مجنون
مش بكره ولا انا حنون
بيذهلني فيكي
اللي معرفوش
ليه ترضيلي الضل والتوهان
وأنتي اللي حلمت بيها
ساكنة جوايا دافن نفسي فيها
يا بنت يا أم الشعر غصن ريحان
من كلامها تتغزل الالحان
براحتك يا وردي على حد طايش ف حبك
وناسي ان انتي غصن البان
يا أم الرموش السمرا تندهلي
وام الجفون مرسومة من الالوان
بتوه يا ستي جوا بساتينك
خولي جنانيك رافض يدخلني
وصادق الوعد رافض أنه يتهان
بندهك وأسالك
و أحبك و أستسمحك !
16/09/2009
MOHAMED ATEAA

الخميس، 10 سبتمبر 2009

من غير تفسير



(1)
يا ريتيني أقدر أبعد و أهرب و أطل
أزحف يا عمري بعيد عن شباكك
أكون كفؤ ليكي
أو حتى عدو ليكي
أجمح ف الحياة
أرفض أني أكتب شعر ليكي أو لغيرك
(2)
ياخدني فجاءة ليكي الحنين
وليكي لوحدك أشد الرحال
اخطي فوق جثث اللي قلبي
أنده و في حضنك
أستغرب ايه اللي جابني
(3)
ولكن كل ده من غير تفسير
ليه بكب فيا حنانك
ويرجعني ليكي لحن من غناكي
أو كلمة شاردة
تقوليها بحبك
ينغزني عودي لأجل
أني أقول وحشتيني
أكتبها بالدم على وش الموج
لاجل تعرفي لاجل تقولي ليه
(4)
اللي باقي مني
على اللي فايض منك
كده ف حالة أندهاش
ف حالة ثبات
أدور ف الكلام يهرب الكلام
أسعي ف بحورك
أتجنن و اجن لكلمة من عينيكي
للمسة من روحك مشبوبة
بغمزة دلع منك
(5)
يسيطر عليا شيء واحد
ف خيالي
أني أهرب اليكي
و أسعي بالمشوار
لأن البعد عنك
بجد مالوش تفسير
مش قادر أكتب و لا أنده و لا أقول
كل اللي عارفه أني مش أمير
في أيه يفيدك الحرير
وانا توب عليكي
دوبت من زمان
دفاكي حضني ف الزمهرير
بحبك وحبك بجد شيء خطير
(6)
بتحبي بشكل يوجع
ونورك بيلمع
وسحرك بيخطف الابصار
بوحشك بشكل يألمك
ده مين اللي قالي ان الملايكة مش بتتطال
قربك ده جنة ونار وتلج وانبهار
محمد عطية
10/09/2009

الأحد، 6 سبتمبر 2009

كاريزما




(1)
بلاش شغل النعام
و أكرهيني بالأصول
سيبك من ركامي ومن الفضول
سيبك من الالتزام
و أدب الضحية عند وهم القبول
حتى لو أترفضت فانا جربت
ولو مر الف عام من الذهول
(2)
الفرق ما بينا
ان واحد شافك فحبك
والتاني فكر يشتريكي
وأنتي كاريزما خاصة
من ورا شمس دهبي باصة
نورك بيدوش سحرك بيروش
لكن سهمك مبيصبيش
(3)
أيه الدلالة
ان انتي ليكي ف قلبي
نحت لصورتك
غير أني أقولك
وجودك مشع
وعاملة حواليكي ألف فخ
مش أنا اللي أنده وأصرخ
وأطلب مساعدة من حد غريب
زي ما فتحتي القلب بأيديكي
تخيطي جرحه بنفس البرود
ومن غير حتى بنج
(4)
وليه المخدر وجودك مخدر
بيسحب ارادتي ويشل حركتي
وبافضل أئن
لأمتي يا وعدي
أعشق ما بينا لقا العيون
أشوفك ف حضنه ولا أقدر أقول
أنك بتقدر يا عمري تخون
ليك كاريزما خاصة
(5)
من سحر الجفون ملكت الكتير
ليك حضور طاغي
مجرد ما تيجي أتحضر لأفر
أتحضر لأهرب أتحضر لأقتل
لأاعرف أن العبير ساعات بيبقي مر
لما نمل جيوشك جوايا يمر
ساعة لما اشوفك أنسي الالوان
والزهر و الحجر
الشهوة في عيونك أصدق من القمر
وانا ركابي سايب
وكلامي ف شعري بيعمل عجايب
(6)
لأمتي هافضل عاوزك مش عاوزني
لأمتي هاحبك وأنت مش عارفني
وأنت بجد كاريزما خاصة جدا
بترغي تفور كل البحور
بتسجن ف عنيك الالحان و الزهور
ويفضل قلبي وحده يمور
يغلي ويمني نفسه ف السعادة
(7)
الحب مش بالغصب
وكمان مش بالهرب
الأجمل من الرفض أنه قبل الطلب
أستحالة تشوف الشوك جوة الورد
وأنك تدي ليا أي وعد
أو حتى أنك تاخد على نفسك عهد
أن حضورك يبل ريقي
أشوفك عادي ف طريقي
من غير ما أنهار
من غير ما أتكلم ويايا و أحتار
بكل طلاسم الدنيا استسمحك
أنا مش سربالك ولا هاكون
أنا ف الحقيقة شوية أوهام ظنون
مش لازم أبقي شاطر ف العيون
لأجل أعرف انك كاريزما خاصة
حضورك فيه جنة متفصلة
بس حبك بيقطع ويكوي
زي حد المقصلة
محمد عطية
06/09/2009

الثلاثاء، 1 سبتمبر 2009

؟


(1)
دهشة شعري ف وصفك
مفيش كلام يكفي
شال من جسمي بيحمي
رمشك الشارد المخفي
يا نن نن عيني
حنى أيديكي من دمي
أصبغي خصل شعرك
من جوة جوايا
خصلة خصلة من همي
(2)
يا ساحرة من غير سحر
يا أميرة ف الغواية
حوا رمت بذرتها جواكي من بدري
رمتها جوايا وجواكي وف الحشايا
جيت اليكي وندهت ليكي
تردي ليه وازاي
وانا من مجاذيبك
(3)
بحب فيك عندك و رفضك
بحب الزوايا جوة روحك و التنايا
بسال وأدعي مني اليكي
وأنتي بترفضيني أكره جحودي
وأنتي مهرة شاردة
يا رتني كنت حوذي
أكربج دراعي لو قرب بس منك
وأمحي عيوني لو استحوا
وبصوا ف يوم عليكي
مش انا اللي فوقك بجد انا اللي تحتك
ويوم ما أموت بجد هافرحلك
خلصتي مني من حد حبك
(4)
من حد لف وراكي الموالد
من حد شرب وراكي المهالك
ورغم انه عارف انه والله هالك
لأمتي ف كفري بيكي هاعاند
وهارفض
ايوة انا من عبيدك
ولا عمري ف يوم انا كنت سيدك
ده انتي ليكي ف كل قلب مقام
حتى الرفض منك ف قلبي غرام
لأمتي هاخف ليكي مرة كل عام
ولأمتي تتركني وحدي ف الزحام
يا سايبة جوايا شوية ركام
ودايما باسيب من أيدي اللجام
وف برد قلبك بافرش وانام
(5)
سبت نفسي أنشد وراكي
بدون وعي منك
نسيت اللي ليا وحفظت اللي ليكي
لامتي يا ستي هارفض رسايلك
وانا ايش جبني وردة ف جناينك
أو حتى حطب ف نارك
نارك اللي جوة القلب شابة
لا قادر عليها ولا راضية تستخبي
وترفض تبان
وتسن السنان وتصب الحنان
وترجع تزيد
وتوعد وعيد
انها تألم اوي
ألم العبيد
(6)
نفسي ألعنك
بحق رفضك ليا
نفسي أكرهك قد حبك ليا
نفسي أمزع ضلوعك بأيدي
زي ما انتي منسرة لحمي بكلابك
ونزغاني اوي بكرابيج عبيدك
عندك ده حتى وانا فوق صليبك
هاقولك بحبك ومش هاسيبك
في حد يعصي ويرجع يتوب
يرجع يعصي تاني
ده حتي من جوة ترفض
تسمعله كل القلوب
والقلب من جمالك يتصدع يدوب
(7)
يا رب سلم
ديه حكايتي وقصتي
وان كنت كدبت
اكيد انت عارف بحق المشيئة
واكذب ازيا وانا طمعان ف رحمتك
يا رب أرزقني فيها محبتك
محمد عطية
01/09/2009

الجمعة، 28 أغسطس 2009

أنا ف الورق


(1)
خلاص انا كرهت الورق
كرهت كل الشعر
اللي انت كاتبه ليا
او لغيري
آندهشت ليه هو انت فاكرني بس ورق
نفسي أطلع برة نفسك
نفسي اوريك مقامي
أرقصلك احكيلك كلام
أصلي وراك وأنت الامام
تندهش لما تعرف
أعرفك انا قد أيه
واني جيتلك ياما في المنام
(2)
الشعر شعرك
بس الاحساس بتاعي
الجرح جرحك
بس الي بيدبل ويسند دراعي
بس خوفي لما أهجر الورق
وآجد ليك
أعصي كل الحروف اللي قالت
لا ليك
(3)
وشبهوني بالجرس
برن لك في أوقات الخرس
ولاني دايما باجيلك
لاجل انك تكتب حاجة جديدة
كنت أنتهيت
بس من حبك ما آرتويت
(4)
أفتكر كام مرة
قولت فيها بعشقك
كام مرة مثلت فيها
كرهي ليك
لاجل تحس بطعم الحزن
يملا شفافيك
وينزل سايل على خدك
(5)
نفسي أطلع من الورق
انا اكتأبت انا أتخنقت
نفسي اني اموت ولا تلمسني تاني
ف خيالك
نفسي أخونك مرة بس مش ف المنام
أحس دمعك دافي على شفايفي
انك تنهار ف حضني
بعد سنين ضياع
(6)
نفسي أحس نبضك بأيدي
أكتب فيك شعر
زي ما انتا ليل نهار
بتكتب شوية ف عنيا
شوي ترسم فيا
نفسي اصرخ
نفسي اخرج من الورق
نفسي أجرب الغرق
نفسي تشوفني انا
(7)
انا مش واحدة
ولا كل واحدة
تشوفها تحبها
تجري تكتب عنها
بص ليا
هو انا مش ف الورق
بس يا هتحبني
يا آما هأقتلك
محمد عطية
28/08/2009

الأربعاء، 26 أغسطس 2009

زي الأصول


(1)
بنبهر بنوع الحنان
الوارد مني منك
صعب أني أبصلك
من غير عيوني ما تطلب النجا
من غير عيوني ما تفلت من عيونك
صعب أني اشبك في رمش منك
وما اشتهيش اني اشوف العين
(2)
ولاني صعب أطبطب
عليكي من غير ما روحك
تنغز ف روحي
ولأني صعب أني أبوس
شفايف من الزهر
حاملة ريحته ولونه
(3)
مسك عيونك بيأذي
من غير وعي منك
جفوني
لمس الحرير مبيأذيش
غير اللي سابتله
منه جواه حتة منها
كل ما يلمسها يتنفض
وروحه منه تتقبض
(4)
لأمتي للهمس يكره
وللمس يشتاق ويتلوي
يا عافاكي روحي
ليكي ألف مكان تلضمي
فيه حكاياتك
ليه تختاري قلبي تزوريه تأسريه
تندهي بعلو صوتك وتجننيه
(5)
يا ست البنات
يا غمزة بتوجع وانتي نايمة
انا بنام لأجل أحلم بيكي
وأصحي لأجل الأقيكي
وانا صوتي غزل ف أيديكي
جسمي ليكي بكر خيط
أغزليني أو لخبطي غزلي
أعملي مني سجادة صلاة أو أنغزيني
كري مني خيطي
خليني لا أنفعك ولا أنفع غيري
(6)
بس أبعديني عن عنيكي
أو أيديكي
خليني أصبر لأجل أطول
أديني صك القبول
يمكن لما أصبر أصوم
أبقي ليكي راجل زي الاصول
محمد عطية
26/08/2009

الأحد، 2 أغسطس 2009

مش قادر


(1)
المذهل ف الاحتياج
ان الحنان مالوش حساب
أن مفيش قانون للعطاء
محدش بيتحكم عليا
وفي حضنك البقاء
مع انه حرام
أن كمال اللمسة ف اللمسة
مش محتاجة كلمة عشان الوصف
أن آلم العوز بيجري ف الدم
هو طبيعة جايز
بس منعه بجد انتحار
(2)
شوقي لاني ابكي ف حضنك
أكتب شعر وانتي عريانة قدامي
أتامل ف خلق ربنا وانا بعصاه
ناسي كل حاجة
وحتة منك ف أيدي
عرفت آدم ليه أتغوي
وليه يوسف من شهد مراة العزيز داق
وارتد بأمر ربنا
(3)
بس انا عبد
ملاكي رافض يدلني لطريق
جوايا نار بتزيد أوي بقربك
أحس ان قلبي بيتشال ويتحط
أيه أجمل من شعر أكتبه
و أنتي ف حضني
أيه أجمل من همسك المحموم
بعد رحلة متزينة ف السما
فيها أنتي دليلي
(4)
أنتي أنكساري الاول والاجمل
عرفت خطيتي وانا بقرا تراتيلك
و لان ربنا عارف اني مش كده
ولان ملاكي عارف اني مش كده
بس انا عبد بجرب الخطية
وهي ممزوجة بالجهل و الدهشة
احساس جديد عليا و عليكي
مزيج ما بينا مفحور
له ذنب عند ربنا
(5)
أنا بجد فاقد الاتزان
يا رب انا مش فاجر
ولا حتى أتجرأ
اني ابقي كده
انا مش ساحر
ولا حطاب في غابة خطايا
كل الحكاية أني ف رحمتك
طمعان أتوب
بس مش قادر
محمد عطية
01/08/2009

أخر المتمة


(1)
آستحالة أرغب فيك
أكتر من كده
أنهشك وأكل لحمك ني
لان مفيش منك ومش
هلاقيك ليك زي
أستحالة أقتل فيك
و أنت من غير روح
و أنت بتفرفر و أنت مدبوح
وروحك مليانة جروح
(2)
ليه انت كده
بكره بجد استحمالك
رفضك واستهبالك
قبولك لحز السكين
يحز ف رقبتك
و ابتسامتك من الودن للودن
بكره لون دمك الوردي ف الجريان
و ركوعك ساعة الدبح
أنتظارك ف طابور الصفح
و انت مستني حد يبل ريقك
(3)
ليه الوجع كفر منك
معدش بيوجعك
بجد أرفض في مرة
أني أسحلك
أسلخلك جلدك و أسجنك
أبصلك بصة زهق وكفر
أعمل فيك ايه اكتر من كده
(4)
ليه صبرك فاق الحد
دافن نفسك تحت سد
هو أنت أيه
أكيد مش انسان
ولو ملاك الدنيا ديه مش ليك
ولو شيطان تبقي ملكش
عازة غير في النار
(5)
سمي ف عروقك
سيفي ساحبه ف ضلوعك
مفيش غيري غيرك
عمل فيك كده
دنيتك سجنتك
وانا اللي هلكتك
مزعت منك ولبست جلدك
و أخر المتمة عن جسمي سلتك
محمد عطية
16/07/2009

الخميس، 2 يوليو 2009

أنا ف الانتظار



(1)


لأن القدر مبيتعاندش
ولأنه كمان مبيتعرفش
ولأن الغيب ميتوصفش
انا لسه معرفتكيش
وأنتي بين ضلوعي
سارية حاضنة قلوعي
نمنمة ملامحك ف عنيا
خصلة من شعرك ف أيديا
دايق صوتك بشفايفي

(2)


لامتي هافضل مش عارفك
لامتي هاشوفك ف كل البنات
أجمعك زي البازل
من كل واحدة أعرفها
أخرجك حتة حتة ف كل حاجة
أخطها بأيديا
أعشقك بس بعنيا


(3)


بس قدري أني ماطولكيش
أنتظرك لحد ما قلبي يخدل
ومتجيش
لامتي هاكره القدر وهو ميتكرهش
ذنبي أني معرفتكيش
وأكلمك وانا مبكلمكيش


(4)


لو السحر يعرف أنتي مين
كنت سحرتلك
كنت وشوشتلك الودع
كنت اشتريت كل الصدف
وصاحبتلك كل الغجر
كنت جبت حتة من القمر
كنت سافرت لاخر الدنيا
وهناك سجدت


(5)


صدقي ان ف الانتظار
لذة وقتل
انك تنتظر وهم
واه لما يطول الانتظار
ساعتها ملامحك بتدبل ف عنيا
و أرمي نفسي ف حضن
أقرب واحدة قدامي
و أرجع أندم بجد
أستغفر اني خونتك
و أطلب منك العفو


(6)


فلو يرضيكي الجلد أجلديني
لو غفرانك بالصلب أصلبيني
بس بجد أظهريلي
خليني أعرفك
من ذنوبي وف نهر شعرك طهريني
بس أرحميني من الانتظار


(7)


أيه يفيد أنك نبي ووحيد
شجرة ف جنة
مش بتتمد لها ايد
القسوة ف الانتظار أنك
متعرفش أيه المبتدأ و أيه الخبر
لان مفيش حد بيعرف القدر
حتى لو زيك مكانش فعلا من البشر
بجد انا والله تعبت من الانتظار
هو انتي لسه متعبتيش
بجد من السفر

م.ع
02/07/2009

الثلاثاء، 30 يونيو 2009

اخر واحد



(1)
رغم ان حنيتي
بالظبط هي حنيتك
ورغم ان ناري
في الاصل
هي جنتك
ورغم الحزن اللي معيشه نفسك فيه
ورغم الوهم اللي قاتل نفسي انا بيه
رغم الصراحة والوقاحة
ورغم كل البجاحة
ورغم اني مش لابس ورقة توت
ولا كلت اي تفاحة
احب ابشرك
ان اخر حد هتخونيه
هو انا
واخر حد هيحزن ليكي
هو انا
(2)
حياتي بيكي مليانة اوي
زي صحراء من غير رمل
حزنك مبني على فرحي
مبني دايما على الهم
لو عرفتي تعدي رمل الصحراء
تعرفي تعدي احزانك من فرحي
تعرفي ليه السنة 12 شهرو
ليه الستات بيحبوا القهر
ومين اللي قلبه عامل زي الصخر
(3)
حكايتي معاكي كناية عن حاجة
زيادة فيا وكتيرة عليكي
نقص ليا ومش كاملة فيكي
او ابتهال لراهب
في معبد فاضي
او ترتيلة لمسجون في عفو قاضي
(4)
بادعيلك بشئ يفرحك
غير المي
بتمنالك بشئ تدوسيه غير قلبي
بتمنالك تشوفيني حتت
تفرحي وتحزني وتجمعيها
بدعيلك تجمعيها حاجة حلوة
وتفكري انك تبيعها
بس برضك في اخر الطريق
مفيش حد بعدي
لاني اخر حد
هتألميه من غير قصد
هتقتليه من البعد
لاني الاخر
وعارف اني لازم احط
لحياتك حد
!!!!
م. ع
5/5/2009

خبال عاشق


(1)
مكنتش أعرف أن القسوة
ف حبك نهم
وان البعد عنك أتصال
واللمس فيكي انفعال
مكنتش ببكي بحساب
ولا بستني منك جواب
خدرت نفسي عشان
محسش باي ألم
وانا بشرب السم من أيديكي
مكنتش عارف أيه العمل
(2)
حبست نفسي جوة سجن
أنتي سوره
مكنتش أعرف ان نحيبي
فيه لذة ليكي
ولو كنت عرفت
كنت زودت
كنت أحبس نفسي تاني
كنت أبكي
بدل الدموع دم
كنت أشتريت منك هم
كنت لفيت بأيدي
خنجر عشقك وهو
مغروز ف قلبي
(3)
كنت رفضتك تحييني
وانتي بتموتيني
مكنتش أعرف ليه
حبك ف قلبي
زي الوشم
زي الضي
زي الكتب اللي
صفحاتها لسه بيضا
متكتبش عليها
والشعر اللي لسه متقالش
وجناح الملايكة
اللي لسه متطالش
(4)
انا غزلي غزل
لونه اردوازي
لانك ف لون الشفق
والغزل فيكي صلاة
خبلي فيك تجلي
واندهاشي فيكي انعكاس
وصول زي مبيقولوا
تأمل او اشتياق
ولاني انا المجذوب
فالبعد عنك بيخوف
وعشقي فيك تصوف

م.ع
30/06/2009

الأحد، 28 يونيو 2009

الحزن مش بس ف القلب


(1)
أيه يا ربي المغزي
في أني أشوفك
في أخر يوم
ليكي على الارض
وليه شربت من حنانك
شهد وخمر
أندهاشي وأنتي
على كتفي
وانا اللي مفيهوش روح
بدني سليم
بس مش خالي من الجروح
(2)
مع أني توبك مش هو توبي
قلبي محتملش انك مش هنا
ومع أني خيطتلك
من جلدي كفنك
و سرجت روحي ليكي سراج
شايل حزنك ف قلبي
وماشي بيه
لا اقدر ابيعه ولا قادر
أني أشتريه
(3)
حزني مش في أني فقدتك
ولو ان
الحزن مش ف القلب بس
الحزن كمان ف أني
مش هاسمع منك همس
مش هالمسك
ولا ابكي على
كتفك زي زمان
وانا مدوقتش شهد غيرك
(4)
يبحاوطني شك
أنك مكونتيش موجودة
أو أني أنسي انك انتي انتي
او يمكن أشك لحظة
اني انا اللي مش موجود

م.ع
28/06/2009

السبت، 20 يونيو 2009

قلم رصاص


قلم رصاص

(1)
كل ما أكتب حبك ف قلبي
ينمحي
بعد ما أقرب منك أبعد بعيد
و أستحي
يرفضني وجودي
وتضيق عليا أرضي
أعرف فين حدودك من حدودي
(2)
أحس أنك كهرمان
مش موجود
أنك حاجة معمولة للخلود
بس أنتي لخبطتي
غزلي قبل المحي
أنساكي ازاي
وبيفكرني بيكي الوحي
بتوحشك وأشعر أنك شرر
أخاف منك ومن المطر
شعرك جدايل بس مشوارك سفر
(3)
اليأس في أني أفتكرك
عذابي أني أكتبك ف قلبي
سطر سطر
وأمحيكي من جوة قلبي بالأزميل
أنحتك تمثال
يشهد علي التضليل
(4)
على ان عذابي ملوش نهاية
وان حبك ف كرهك
هو الغاية
وبسن قلمي الرصاص
هاكتب بيه الخلاص
والجرح لسه ف البداية
لسه في قلبي
جرح مندملش
من المرة الاخيرة
(5)
لسه لوني مش صافي
راسم نفسي بالقلم
واحد من مجاذيبك
اللي باقي مني
ع اللي باقي منهم
مرسومين ف أسكتش من خيالي
مترسمش من قبل كده
ولا هيترسم
أيه يعني أني ف حبك أنفصم
أرتعد و أنقسم
مش الرسم بالقلم
لازم صاحبه ينوسم
ويدفع لاجل ينوشم

م.ع
20/06/2009

الأربعاء، 17 يونيو 2009

سمت الملايكة


(1)
بسبح بحمد ربنا
أني معرفتكيش أكتر من كده
لان جمالك مستحيل
معاكي أصبح موتي حل
وحياتي مش مفروضة بديل
(2)
أدم مكانش عارف أنه محتاجك
وجيتي
مكنتش لاقي فيا حاجات حلوة
بس أنتي لقيتي
مش بقدر أبص في عنيكي
وسبت اللي باقي مني
لاضم في بيتي
(3)
مش مستني منك رد
ولا عايز عليا عهد
ف الحقيقة أنتي كتير عليا
شمعك يكفي
ينورني جوايا
أبتسامتك بترعشني بتخليني أفرح
أو بتخليني بعد أما اتبني
أتهد
(4)
نورك من أسمك
الحمد لله أني مغرقتش
ف التفاصيل
لانه مش من سمت الملايكة
أطلاقا التهويل


م.ع
17/06/2009

الثلاثاء، 16 يونيو 2009

وهم أبيض


(1)
كل يوم ف
نفس المكان أنغزل
ينفرط عقدي و أنفصل
أنتشي بروح نسيم هايم
أفرح كأني هاندفن
بعد ما كنت
جتة في اليم عايم
(2)
حبة أنحبس جوة قفصي
وأفتكر ان الركام
شيء ملايكي
من الجنة كان بس انكسر
زيه زي في حالة ضعف
ولاجل الممات وكل حالات السبات
واللي جاي واللي فات
(3)
بقيت بندهش من حاجات
سابت فيا أثر
او حاجات سبت فيها انا اثر
أيه اللي أنكسر
جوايا واحد مات والتاني أتقتل
وتالتهم في الاخير عاش بس أنتحر
(4)
في حد شاف حد
ساب نفسه لحد ما اندثر
بكي لاجل يرجع الحتت
اللي وقعت منه
رفضت حاجاته
تعود اليه
باع نهره بدون حق أنتفاع
ساب نفسه من غير خط الدفاع
أتقتل واتنهب مش من حد غريب
حبس نفسه جوة نفسه عن أقتناع
(5)
أو عن بجاحة وفجر ومعلمة
ف النهاية روحه مسلمة
حب ناره لنورها
وكره جنته لانها
بتبقي كتير أوي مضلمة
كره أوي حب السيطرة
ساب نفسه تسيب نفسه
من غير حساب المسطرة
ساب ده كله
وجري ورا وهم ابيض
زي لون المحرمة


م.ع
16/06/2009

الأحد، 14 يونيو 2009

الانتقام مش دايما بارد


(1)

مين اللي قال ان الانتقام

دايما بارد

وازاي أغمي عنيكي

وانا اللي مشوفش

و ازاي انك تاخد حياتي

واديهالك انا برضا نفس

ليه بتجزي في عروقي

تنفضيني من جوايا نفض

وتحزني بس متبكيش

وتبصيلي بس متلمسنيش

وازاي أغفر انا وحدي

وتكونيلي ذنب ميتغفرش

ايه ذنبي اني

كويت اسمك في قلبي

وحفرت صورتك جو ة نفسي

(2)

طلقتك زي سرب حمام

معدش ريشه أبيض

مبقاش يحب لحد الخير

معدش يلضم في اجنحته

غير الشر

يبكي اوي في المياه

يكوي قلبي ع البر

(3)

انتقامي مش مخيف

مش هابكيك و لا هاوريك

مش هنده على ايه فاتك

وفاتني

بس يمكن انت بقيت

بالنسبة لي مش موجود

نسيت ايه عملت

انطويت على نفسي

اتكومت

كنت فاكر اني منك بنتقم

بس صدقني اللي حصل العكس
م.ع
14/06/2009

الخميس، 11 يونيو 2009

أنا مش عبدة

(1)
ألمني بعدي عنك
في قربك بتجرحني سكاكينك
كلامك بيحييني بيسحرني بيكويني
أنا ورقي أبيض أكتب عليه
أنا عودي أخضر لاجل تحن اليه
أنا سقفي صافي و نبعي دافي
عملت نفسي بستان وطردتني منه
لاجل تسكن وحدك فيه
(2)
سن سحرك على جسمي
وأرعشني بكلام مهموس
أسحقني أتعبني
أعملني طلسم ميتفهمش
أحرقني بلمسة منك
بهمس وانتي ايديك في ايديا
رموش عنيك بتقتل
بشوق وانت بتبصلي
أيه أجمل من لمستك وانتي بتصلبني
(3)
معرفش أكتب شعر لغيرك
مفيش غيرك بيغويني
في حياتي راجل يعني أنت
بكرهك قد ما بحبك
بشوفك بتندهلي
بعرف منك حاجات متعلمتهاش
بشوف فيك حاجات مشوفتهاش
(4)
فأمتي تكدب و تقول
أمتي تريح ظني
أمتي يا حب مقتول
يا أغلي حاجة مني
يا شئ فوق الوصف
يا قلب نسيته في كهف
قول بحبك ولو بالرسم
ألمسني أتعسني
نسيني مين أكون نسيني كل الظنون
(5)
بس أنا مش في حبك عبدة
و لا أنت شاريني بمالك
أنا مش حاجة مش موجودة
أنا مش موجودة بس في خيالك
انا واحدة لحم ودم
انا روح وهم
انا سعادة وغم
يكفيني تقولي كلام جميل
تقولي وحشتيني ولو علي سبيل التبديل
(6)
تحزني يوم تبكيني يوم
بس كلامك بيمزع فيا
وسكاتك بيقتلني كل ساعة
يا مجنون وانا مجنونة بجنانك
يا أقسي حد عليا بحنانك
يا تفكيري فيك في ساعة حنان
يا ابتسامة على خدي
محفورة من زمان
(7)
مين أنا
غير واحدة متمنياك حبيب
تعصمني من نفسي ومن الغريب
انا مش حرة في اني احبك
بس انت حر بعيد او قريب
انت عندي هنا انت ليا انا
انا كلامك اللي مستنياه تقوله
انا وردك مستنياك تسقيه
انا امانتك اللي مش هتخونها
انا بنتك وابنك اللي هتراعيه

في الأصل أنسانة

(1)
دهشتي في جمالك
مالها حد
أرتياحك في اللي باقي مني
وهو مش عارفه بجد
بس اللي باقي مش كتير
يمكن انا
مش فارس ولا امير
يمكن مش معايا
زبرجد ولا حرير
لكني كياني داب فيكي من نظرة
واكيد شافك ليا المصير
(2)
بخطوة سبقتك لاجل أشوفك
مشوفتش منك غير كسوفك
زيك زي البنت الصغيرة
بتتكلم بعينيها بايديها
وصوابعها الخمسة
واي حد يدوب فيها من لمسة
يعشق جمالها بس من همسة
ومع اني من غير دليل
ومش عارفك
ولا عارف ليكي بديل
شوفتك قمري
وليلي وضلي
شوفتك ليا خلى

(3)
سمحت لنفسي أعرف انتي ايه
وليه موجودة في
الزمن ده
معرفتش أرد
ولا لقيت جواب
بس زيك زي السحاب
زيك زي موج البحر
زي الطيور زي السراب
(4)
عفوك عليا نظرة
واكيد الكلمة منك استحالة
بس عفوا خليني
اقول في الاخير
أنتي في الاصل انسانة

غبي جداً

(1)
غبي جدا لو صدقتك
او صدقت نص الكلام
ايه يحصل لو رجعت لك
وايه يحصل لو قلت سلام
عشان ارجع لك
لازم انتي تمشي
وعشان افرحلك لازم
انتي تبكي
(2)
جرح سكينتك في قلبي
لسه ملمش
و الورق الابيض اللي جوايا
لسه مكرمش
نزف قلبي قدامك
بس ميهمش
زي ما جرحي عندي ليا
برضك جرحك عندك ليا
حزني اني دايما
بيضَحك عليا
انتي من الاخر سطحية
بس كدابة
غبية وفاكرة ان الدنيا ديه غابة
(3)
انفرادي بيكي فيه
حاجة ناقصة دايما
كلامي ليكي
مش حلو في المجمل
كلمة بحبك منك
عمرها ما بتكمل
كدبك حقيقة مضطر اصدقها
كلامك مقدس مينفعش ارجع فيه
بس كلامي
زيه زي التراب اللي بتدوسي عليه
(4)
الوهم في حياتي انك موجودة
انتي مطلوبة جدا ليا
بس مش بصدقك
بكره كدبك وانفعالك
بكره صدقك كتير
بس بكره اكتر ارتجالك
بعاني كتير في بعدي عنك
عشان مش عارف انتي ايه
ومش عارف انتي ليه
بتعملي كده
ليه بتكدبي وفاكرة الدنيا كدبة
او لعبة
على فكرة الدنيا مش غابة
(5)
لو موتي هيريحك اقتليني
لو بعدي هيفرحك ابعديني
لو انا مش عاجبك
مزعيني خليني حتت
بس اهم شيء انك بتصدقيني
وخليكي عارفة ولا عمرك
في يوم هتغليبني
فانا غبي جدا لو فكرت
انك بتحبيني

انتي معني تاني

(1)
عاجبني فيكي غموضك
وثقتك وشرودك
وكمان عنيكي الواسعة
اللي فيهم حاجات كتير
فيهم الوان مش عارف الوانهم
فيهم سعادة وشقا
فيهم حاجات بتقولي انا هنا بقي
فيهم السحر اللي مبيسحرش
غير اللي يفهمه
وميندهش غير اللي يلزمه
(2)
بكلمك في صورك
وفي حاجتك وورقك
بفتكر ضحتك وهمستك
بفتكرلك حاجات بتزعلك
وحاجات تانية بتفرحك
ضحكتك ضحكة صافية
بترن في الودن
كلمتك كلمة صافية
دايما بتخليني احن
فيكي من كل حاجة حلوة حاجة
متعرفيش من الحاجات
غير الصح وبس
الغلط ممكن متعرفيهوش
لانك اساسا مبتعمليهوش
(3)
بساطتك في غموضك
ورقتك في صمتك
سكتك من طريقين
منهم واحد حلو
والتاني احلي
يمكن اصعب حاجة انك
لما بتبكي بتبكي بجد
واما بتزعلي بتزعلي من كل حد
(4)
الزهر ليه في عنيكي معاني تانية
والقمر ليه في فكرك رؤية تانية
بتحسي ان القمر جه منه الشجر
وبتقولي ان احسن ورد
هو الموجود وسط الحجر
لان مفيش ايد طالته ولا هتطوله
وانتي بتحبي لانه زيك بسيط وعلى اصوله
(5)
بحب لون كلامك
بحب لما بتتعملي حاجة مني
حاجة مكونتيش عارفها
بحب كلمة اقولها
وقبل مني كنتي انتي قايلها
وبحب مملكتك من ارضها لسماها
يمكن ده اول الجنة
او الفكرة او الكلام
اول سعادة السعادة
واكيد مش منتهاها
(6)
ولانك لدنيا تانية
ولان في دنيا تانية
ولانك المفروض تتعاملي معاملة تانية
ولانك وردة حمراء
متغلفة بقطيفة خمري
وعشان كل ده
انتي معني تاني

في نفس الوقت

(1)
زي ما السحاب
في السما ممدود
وزي ما الحب من
قلب الكره مولود
وزي ما عمر البشر
معدود
أحلف اني حبيتك
وكرهتك في نفس الوقت
حبيتك من كل قلبي
ويمكن عشان كده انا ضعت
راحت معاكي ايامي
بس انا رجعت
(2)
ايامي معاكي الحزينة
اللي شبه ورق الشجر
في الخريف
شبه الانسان وهو حاسس
انه ضعيف
شبه حاجات كتير متتوصفش
شبه حاجات كتير متتعرفش
(3)
احلف اني حبيتك
وكرهتك في نفس الوقت
كرهت ضعفي يمكن كرهت
قوتك
كرهت نارك كتير
بس كرهت اكتر جنتك
انتي حناني
اللي كرهني اني اكون حنون
انتي عقلي اللي خلاني
احب ان اكون مجنون
(4)
انا اللي حبيتك وانتي كرهاني
وكرهتك
وانتي حباني
اخدت منك كرهك
واخدتي مني حناني
حبيت فيكي حاجات كتير
وكرهت حاجات اكتر
فكان لازم اهرب
وانا بحبك
وفي نفس الوقت
حباني وكرهاني
وبرغم اني اديتك كل حاجة
يرضه في نظرك انا اناني
(5)
ولان كل حاجة وليها وقت
فكان لازم اني اسيبك
واخليكي تسيبني
في نفس الوقت

بدون عنوان

(1)
عشانك مبقاش في حياتي
غيري
وليكي هجرت نفسي
يا طيري
يا شمعة صعب غيري يطفيها
يا كلي اللي مينفعش
اكون غير ليها
يا ساكتة في كل الكلام
يا اجمل من حبَ في الغرام
ياللي ساكنة وسط سحابي
يا سمايا يا ترابي
(2)
يا كل الحاجات الجميلة اللي معملتهاش
يا كل الجمل اللي متكلمتهاش
يا سحري وسر وجودي
يا حاجة محصلتش
في حياتي وموتي وخلودي
(3)
بيكي كملت الاوصاف
عليكي من نفسي بخاف
يا منتهي المنتهي
واللي عمره متشاف
من يوم مشوفتك حبيتك
قربت منك ضمتك
بسرعة ملتكيش
وجايز مفهمتكيش
(4)
يا اللي سر ومخبيه
عن كل الناس
يا احساس حاسه
بكل الاحساس
يا حب من بعيد لبعيد
يا حنان ضمة ام لوليد
يا بشر كتير متجمعة في واحدة
يا واحدة
فيك من البشر كتير
يا اللي السما منك بتغير
(5)
اجمل حاجة ان صورك
متوزعة في صوري
وبشوف حتة منك في كل وش
وفي كل صورة ليكي
من ناس تانية بغش
لانك الاحلي في كل البنات
ولانك الاحلى في كل اللي فات
ويمكن كمان
الاجمل في كل اللي جاي
يللي في رسمك ليا ضي
(6)
يا اللي جمالك ميتوصفش
وحسنك اكيد ما يتفهمش
وفي كل صورة ليا
وفي كل كلمة ليا
في حتة منك بتطلع
بس مبقدرش
مبقدرش ان ارسمك في كل الصور
ومقدرش ابصلك كل الاوقات
وعشان مبعرفش
اعمل كل الحاجات باقول لنفسي
اني بارسمك في صمت
واتكلمك في صمت
وبدون عنوان

من غير حروف

(1)
بشوف عنيكي في الهدايا
و في الصور
بحلم بيكي في الزهور
بيفكرني بيكي
كل الكلام وكل الجمل
وبحب فيكي الشتاء والربيع
بحس ان دنيتي
مقسومة ليكي
وساعات بحس
اني المفروض ابقي اكتر
من كده
(2)
بحلم بيكي قبل ما تشوفيني
وبكلمك قبل ما تكلميني
بحبك كل الحب
قبل ما اعرف ايه هو الحب
شوفتك واشتهيتك
وجيتلك ومش لاقيتك
(3)
بحب اكلمك تلات كلمات
واحب اسمع منك كلمة واحدة
احب ابصلك تلات مرات
ونفسي انك تشوفيني
مرة واحدة
ببصلك من بعيد
واحفظ صورك في دماغي
بحفظ كلام انتي ما بتقليهوش
وبحس حاجات كتير وحب يمكن
انتي محسيتهوش
(4)
رغم اني عارف ان جبتلك كل شئ
وهديتك بنفسي قبلها
الا انك متعرفيش عني اي شئ
ولا عرفت اي حاجة بعدها
بحبك من بعيد لبعيد
حاطط ما بينا
جبال جليد
مقدرش اخطيها
عارف ان خطواتك بترن في وداني
بتخليك من بعيد
جاية عليا بتجري
حافظ الحروف اللي بتنطقيها صح
والحروف اللي بتقوليها غلط
عارف امتي بتحبي الشمع
وامتي بتحبي المطر
(5)
بجمع كلام يمكن اقوله
بحب ابص في عنيكي
وانتي مش واخدة بالك مني
احب اسمع كلامك
ولو حتي مش بتقوليه ليا
بحس نفسي سعيد
لما بفتكرك
واحس اني سعيد اكتر
لما بجيب سيرتك
(6)
الصدفة ما بينا شئ محال
وكل اللي فاضلي هو الامل
ورغم ان حبي من غير حروف
لكني شايفه شئ محتمل

كلام مبيكملش بعضه

- رغم اني بحبك باقول
اني بكرهك
نفسي اوي ابعد عنك
وفي نفس الوقت بعشقك
رغم ان صوتي مش موجود
زيه زي كنز مفقود
بحاول باللي باقي منه
اني اندهك
- عارف ان اللي حاكم علاقتي
بيكي هو الدم
او يمكن يكون الهم
او جايز فاكرك بنت العم
قريبة اوي مني
وبعيدة بعد اليم
- سايب نفسي لروحي
تتكلم وياها كتير
وفاكر روحي عليك امير
وانا واحد عادي
كلامي مبيكملش بعضه
كلامي مالوش اول ولا اخر
كلامي حزين وساخر
ويمكن عكس بعض
كلامي بين السماء والارض
- ورغم حبي لعنيكي ورموشها
بحس اني لابسك توب عليا
فيكي حاجات كتير بس مش باشوفها
وحاسس ان قربك
هو القضية
- بحضر كلام كتير عشان اقوله
وافترض انك هتسمعيه
بروح عند الجبل ومش باطوله
وبسمع نفسي كلام نفسي انك
تقوليه
بكمل كلامي بكلامك
بخلط كرهي بحنانك ببدل مكانين تلاتة
وببيع في الاخر مكاني بمكانك
- يمكن حاسس اني كلامي
مالوش لزوم
بس باقوله
وعلي فرض ان الجبل كبير
مصيري هاطوله

سألتها

- سالتها ليه الحزن دايما ساكن عيونها
وليه دايما الدموع نازلة على الخدين
وليه بقي لحكايتنا حد
وليه دايما بياخدني الحنين
لحاجات عشتها من زمان
وحاجات عشتها من سنين
سالتها وانا بفسر كلامي
وانا حافظ حروف سلامي
وسؤالي كان من العين للعين
من غير حروف فهمت كلامي
ومن غير ردود عرفت جوابها
وباعلي صوتي صرخت ببياني
وهي سالتي ايه اللي جابها
سؤالي مكتوم حزين
عارف ان رده الم
حروفنا وكلامنا
لا فرق ولا جمع

حاجات كتيرة

حاجات كتيرة سبتها
بس معاكي حستها
ومعاكي بس عشتها
لون عنيكي في قلبي اتحفظ
دفا ايديكي في قلبي اتحفر
الوان هدومك
كلها انا حفظتها
حروف اسمك
حرف حرف
انا رددتها
وحاجات كتير يمكن زمان
ما افتكرش اني عملتها
عشانك بس عملتها
قصايد كتير الفتها
ورود كتير حضرتها
حى هدومي هندمتها
وعشان حاجات كتير
فيكي بحبها
ونفسي افضل جنبها
نفسي اعيشها كلها
احفظ اكتر في لون عنيكي
ادفي اكتر من دفا ايديكي
احكيلك
على حاجة عشتها
على بداية كل شئ
وعلى المنتهي
واستغفر قدامك
على حاجات كتير زمان
عملتها
وحاجات كتير اكتر
عشانك بس انا سبتها

بسالك

بسالك وانا محتار
وانا جوايا نار
مش قادر بشئ عليها
مش قادر اخد قرار
بسالك سؤال
محيرني من سنين
وبقهولهولك وكلي حنين
بسالك هو انتي بتحبيني
بيتحيني
او حتى ساعات بوحشك
زي ما يتوحشيني
ولا كل الحكاية
ان انك بتستلطفيني
بسالك وانا مش عارف
اجابتك هتكون ايه
مش عارف هل هتكون
اجابتك وانت بتسال ليه
ولا اجابتك هتكون
انت عاوز توصل لايه
بسالك وانا عارف اجابتك
هتكون ايه
عارف اجابتك من حاجات كتير
عارفها زي ما عارف
ان الاميرة دايما مش بتتجوز الامير
وزي ما عارف ان الصغير
في يوم بيكبر ويبقي كبير
عارف اجابتك
من شوقي ليكي
وانتي مبتشتاقيش
عارفه من احساسي بيكي
وانتي زعلانة وانتي فرحانة
وانتي كتير مبتحسنيش
عارفة من لما بفهمك
من غير كلام
بعرف انتي عاوزة ايه
من ايديكي في السلام
بعرف حاسة بايه لما بتيجي
في المنام
وانتي متعرفيش
شكلك كده انك مفهمتيش
جواكي كله انا عارفه
لكن جوايا حاجات كتير
متعرفيهاش
قريتك زي كتاب مفتوح
دخلت جواكي دخول مسموح
لكن جوايا كتب
انتي مقريتهاش
منعتي نفسك من دخولي
ولا ممنعتهاش
بطلتي ليه تقريني
وبطلتي كمان تحسيني
حتى انك خلاص
مبقتيش تبصيلي
انا مش عارف ليه
بتقولي انك بتحبيني
وحتى كتير مبتقوليهاش
بتقوليلي
حس كلامي حس حركاتي
حس بعمل ايه وانا معاك
واللي هتشوفه هنا
هو اللي ما هتشوفه هناك
هل عيونك بتقولي اهواك
وكلامك كله يقول
انك في لحظة ممكن تنسي
وانك في لحظة ممكن
تقولي انساك
وبتستغربي لما باسالك
بتقولي اني باقتلك
بكلامي
وانتي كل يوم بتقتلني
بتقتليني في السؤال و في الجواب
بتقتليني ما بين بصة من البلكونة
وزغدة عند الباب
بتقتليني بمشيتك فوق التراب
وانتي مش بتبصيلي
فعشان كده بسالك
وهافضل اسالك
انتي بتحبني ولا
انتي اتعودتي عليا
اتعودتي عليا اكون
حنين عليكي
اتعودتي ان اخاف عليكي
وامسح دموعك واخفف جروحك
واعمل لك كل يوم فرح وهنا
تشوفيني كل يوم في السنة
وقت متعوزي
ووقت اما اعوزك
ووقت ما اريد اشوفك
صدقني مش هينفع مش هيجوز
ده شئ مش مسموح
انه شئ مفضوح
ان ده عيب يبقي انا صح
انتي مش بتحبيني
انتي يمكن بتستلطفيني
بس انا ماحبش كده
انا احب يكون حد يحبني
حد يخاف عليا زي مبخاف عليه
حد يدعيلي و ادعيله
حد يكون في نهاري واكون انا ليله
وعشان كده بسالك
انتي عاوزاني كده ولا مش عاوزاني
ويا ريت ردك يكون بلسانك
زي ما ردي بلساني

بحبك

بحبك رغم انك مش شايفني
بحبك رغم انك مش معايا
عارف الشجر لما يبقي وحيد
عارف السهل لما يبقي بعيد
بحب ابصلك
وأنت مش واخد بالك
بحب ابصلك وأنت سعيد
- بحب الجمال اللي في عنيك
بحب اسمك وحروف اسمك
بحب رسمك وبحب همسك
بحب سرحانك وتوهانك
بحب جمالك
وفرحتك وهناك
- بحب الشعر اللي لسه
متكتبش فيك
بحب كل الصور
اللي أنت طالعلي فيها
وبعشق الصور اللي معايا ليك
رغم انك ملكش صور معايا
بس حاسس انك ليا
- بحب القمر لأنه بيفكرني بيك
دايما ابصله وميحسنيش
اكلمه وميكلمنيش
مبحلمش المس القمر
أو حتى انه يبصلي
أنا بحلم اسلم عليك
أو عنيك تيجي عليا
مش مهم اللي ان ببص له
أو حتى اللي باصص ليا
كل اللي عندي أنت
بكلمك مليون كلمة في وأنا ببصلك

كل الناس

كل الناس بتجري
وأنا كل اللي همي
القي ليا مكان
ابص بيه على بره
مصر يا حزينة
ناسك اللي جوة
وناسك اللي بره
كتير منهم عطشانين
محرومين من حنانك
اللي خلص
من كلامك
اللي أتهمس
كتير منهم غلبانين
وشقاينين
بس مبسوطين
مبسوطين بضحتك يا بلدي
بلدي يا حزينة
حزن الفلاحين
فيك خير بس موش لينا
للناس التانين
نفسي اضحك معاكي
بس أخاف
أخاف من إيه
من الأنين اللي فيكي يا بلدي
يا مصر يا حزينة
يا حييتي في الضلام
محدش يسمع عنك
في دنيا الغرام
الل حبك حب فلوسك
واللي نفسه يبوس ترابك ويبوسك
من هنا مطرود
داخلك مفقود وخارجك مولود
ناس كتير حبتك واتهمتك
قالوا عليكي كلام ميتقالش
قالوا ان الحلال فيكي مبيتسبش
وقالوا انك على الحرام متتوصيش
أنا بحبك وبحب فيكي جحودك عليا
اللي أنا عارف انه موش قاصدك
بحب فيكي انك عارفة فين المشكلة
وفين الجواب
وانك ماجله كل شيء ليوم لحساب
لو أنا قولت ان بكرهك
ابقي أنا كداب
لو قلتي انك حنونة يبقي ده
الحنان اللي في العذاب
بصوا في وشوش الغلابة
وانتوا تعرفوا مصر مين
مصر أمي وأمك
عمي وعمك
الناس اللي ماتت في
الحروب عشان أرضنا
ناس لأجلك يا مصر داقت العذاب
موش ناسك اللي صاحبوا الكلاب
ولاد الكلاب
بلدي يا جميلة
يا حزينة
يا أمتع شيء بحبه في الوجود
يا شيءمن زمن الخلود
يا اللي موجودة من قبل ما ادم
يبقي موجود
مسيرك تضحكي
طول ما الأمل موجود

وردة جوة كتاب

وردة جوة كتاب
سهم في قلب شجرة
وشوية برد
ولمسة أيد
وبنت عسل بضفاير
شعرها من الهوا طاير
وقلبها في الحب حاير
بنت عسل بعيون جنان
وقلبها كله حنان
وشها لوحة
مرسومة بأيد فنان
عليها نغزتين
يموتوك لو ضحكت
يموتوك لو انضموا
وزعلت
يموتوك ويحيوك
لو همست
والوردة لسه جوة
الكتاب
وكل الأسئلة بقا ليها
جواب
وشوية البرد
جم وراحوا
واللي بقي
دفا لمسة الايد
والسهم لسه جوة
في قلب الشجرة
يحسسك انه قمر
في ليله البدر

بخاف

بخاف أقولك كلمة بحبك
بخاف كتير أني ازعل
بخاف من الكلمة والفعل
ومن الصعب قبل السهل
بخاف أدبل قبل أواني
وانه يتاخد حناني
وأفضل وحيد مكسور
اشرب شاي في كوباية
بأيد واحدة
ومرسومة عليها قلب واحد
وان امشي في الشوارع
من غير ونيس
أخاف انك متخافيش عليا
زى مكتير قبلك عملوا
وزى مكتير بعدك هيعملوا
يمكن احبك وأنتي تحبي
حاجتي اكتر من
يمش يمكن حباني
لأني شاعرأو فيلسوف
أو بقول قصص بتعجبك أو متعجبكيش
مش يمكن حب فيا وسامتي أو أني كلامي حلو
أو حتى حب جناني أو عقلي
مكتير قبلك حبوني بس محبتهموش
كتير حسوني ومحستهموش
يبقي إيه الفرق فيكي
وإيه الفرق معاكي
بتسلمي عليا زى سلامهم
بتكلميني نفس كلامهم
موش فاهمة أنا عاوز إيه كل الأوقات
بتزهقي مني أحيانا في بعض الحاجات
مهو ده الفرق وده اللي أنا موش عاوزه
أنا بزهق بلد بس محبش حد يزهقني
ده عيبي الوحيد
ويمكن فيه عيوب تانية موش عارفها
بس إلي الآن بخاف
ولسه برضك هاخاف
أقولك بحبك بس أنتي وحشاني
ونفسي أشوفك بس
ساعات بزهق أني مش بشوفك
ولما بشوفك برضك بزهق وبخاف

الأربعاء، 10 يونيو 2009

صمتك

صمتك بيجرحني
صمتك بيقتلني
صمتك بيخليني زى الريشة في مهب الريح
صمتك بيخليني زى الشمعة
وسط ألف شمعة جوه ضريح
بيألمني الم صريح
صمتك بيخلي كلامي مالوش لزوم
بيخليني راجع من الحرب ومهزوم
صمتك بيخليني ابكي
بكا واحد سجين مظلوم
احتياج واحد للحنان
وهو من الحب والدفا محروم
بيخليني أفكر في حاجات كتير
بيخليني انسي أن
للزهور ريحة و عبير
بيخليني اخسر حربي
وكمان ابقي أسير
بيخليني ابكي من جوايا
بيخليني أحس إن هواكي
مش هوا هوايا
بيقتلني ويقسمني نصين
نص في سماكي
ونص في سمايا
وحتى النص اللي في سمايا
مش بتاعي ومش معايا
بتحبي لما أقولك
جمالك ساحرني وجمالك أسرني
وصمتك قاتلني
صمتك دابحني
نفسي تتكلمي زى ما بتكلم
نفسي ماتتألميش
حبيبتي زى ما بتألم
نفسي أني في حبك أتعلم
أتعلم منهزمش
أتعلم متاسرش
أتعلم منجرحش
ولو حتى جرح صغير
لأني بحبك وعشانك بتغير
بس سكاتك صدقيني
مش كلامك اللي بيخليني أتحير
أتحير
أشوف إن الشمس ديه مش شمس
بحس إن كلامك كله همس
بس ليه مبسمعوش
بس ليه مبفهموش
هل أنا مبحسوش
حاولي كده تتكلمي وهتلاقيني
بحفظ كلامك كلمة كلمة
وحرف حرف
بحفظها زى مبحفظ
النجوم اللي في السما
زى ما عارف إن أنتي ليا الهنا
أنتي الجمال
أنتي كل الأيام اللي في السنة
في كلامك جمال
بس ميتشافش
في كلامك حنان
بس يا خسارة ميتحسش
إلا لما تقوليه
فقوليه وريحيني
قوليه وخلاص
قوليه بس بإحساس
قوليه حتى لو هتجرحيني
قولي انك
بتكرهيني اوحتي بتحبيني
بس عاوز منك حاجة
واحد بس انك تحسيني
انك تفهميني انك تحترميني
انك تتهزي من جواكي
زى مبتهزيني
وأنتي بتجرحيني
لما ما بتتكلميش
لما بتجرحيني ساعات
ولما مبتجرحنيش
بس اتكلمي
وبلاش تعيشي ساكتة
في صمتك