بحلم

بحلم اكونلك شهيد

مش واحد من العبيد

اجد وابعد

وتبطلى شغل الوعيد

ارتد ليكي واسترد

اشوفك ف سفر

ترحال مش دايماً

حلم مش مكتمل

اكتوي من اللي جاى

اكتر من اللي راح

اسكنك ف زحمة البراح

ارسمك واستأصلك

من جوايا

يا ضلك اللي يائس

معاكي احياناً سعيد

واحيان كتير بائس

بحلم من تلك ارتوي

اكون فوق سحابك

مطر غيوم

اي شئ ميبردش فجاءة

وجواكي يستخبي

بتتعجبي جوايا ومن جمر ناري

تتدفي وتتقلبي

لو مفيش خمر

اسكري من دمى

ميلومش السكران

غير اللي مداقهاش

وما بيحس بوجعى

غير اللي بحبك مقالهاش

مبينطويش جوايا غير كلامك

بجد احلمي

بلاش تستسلمي

بلاش تندمي

ارحلى لفي البلاد

دوري ف وشوش العباد

يمكن تلاقيني

وساعتها يمكن

ف حلمي تيجي وتندهي

تقوليلي انا هنا

انا نفس المكان

بس موش نفس الهنا

انا ليك ورق شجر

شوية مطر

هم يمكن

فرح يمكن

او امير كان بس انسحر

محدش آمر

محدش حلم بيكي وعبر

غيري انا

يمكن لاني لازم استمر

ولازم بيكي احلم

لحد اما الاقي مستقر

محمد عطية
23/01/2010

ف الحالتين

لما ورد خدودك يشبك ف شفايفي

ولما يبقي سكينك غمده جوايا

وسن نصله مدفون

من الناحية التانية

بحبك قد ما بكرهك

و بيبقي ف الحالتين مر

نسخة مملة من العمر

لما اغرق ف بحرك

وانا على الشط

لما أدمن تفاصيلك

واللي يتبقي مني يجيلك

و اتأملك ف شظايا

باقية منى

لما تكمليني

و شيء صغير منك يقسمني

مفيش شيء اسمه ف كل الحالات

ومش لازم احبك من المبتدا

لحد الممات

مش يكفي ان احبك ف كل اللي فات

وف الحالتين مضطر

اني اهجر وارجع

مشوفش اي حاجة

وارجع واسمع

انادي و اسكت

مهو مفيش مفر

وف الحالتين

ليكي وبيكي هاعبر وامر

مش كل شيء بيجرح

بيرجع يسر

لما أكتمل ساعات او مكتملش

لما يكون نصيبي ان اقرب

وانا ف قربي ابعد

و أحزن ف فرحك

وتبكي ف همى

لما تملكيني وتتركيني

وتكوني ف الحالتين

بتقتليني

وورد خدودك جوايا يحييني

محمد عطية
17/01/2010

ساعات

ساعات بافرح ف البكا
و الم قلبي المفتون بنورك
و من تحاويد حياتك
اللي بتجعل حياتي في عينيكي
ومماتي ف مماتك
ف ضل خيالك
أسرح ساعات
ينقبض وعي جوايا
افض اللي جاي
من رموزك
تضحكي ساعات من همومي
واضحك كتير من عبوسك
انا مش نبي
ولا انتي ماشية في موكبي
ساعات كتير بيحصل عكس المفترض
لا انا افترضت ولا انا زعلت
وساعات بيحصل
زي ما أنكتب
لاجل ان ف حضورك
تفقد ايديكي بريق الدهب
ومخافش من عيونك
ومخافش من اللي أنحسب
واعرف ايه انتي مخبياه
ساعات جوه جفونك
هو مش شئ كتير
اعرف خيالك وداني لحد فين
واني مبقاش ساعات
مضطر اداري جوايا الحنين
لأنه أمل
ومفيش قدامي لا حل ولا عمل
و لأن الأمل له وجع
مبيحسوش غير المنتظر
او اللي ماشي ف ركابك
وواقف عند بابك
اللي جرحه دايما ف اللقا
وكلامه من سكاته اتحكى
واللي ساعات كتير
بيفرح ف البكا
محمد عطية

11/01/2010

لأجل الورد

لأجل الورد اللي
مبقاش ورد
اللي مسقي دم
اللي شايل هم
لاجل الوجع اللي مبيألمش غيرنا
لأجل انك تشتري فينا
ومن غير عراقيل
وتشتري من ارواح رخيصة
كل ذنبها انها على الحدود مع اسرائيل
لأجل الورد أما يبقي شوك
ولما تفكر مين عدوك
من اتنين بيدبحوا فيك
لما الجحيم يبقي بوعد من غيرك تنوله
لما تبقي العدو
في خطبة الجمعة في الجامع
اللي لسه مصلي فيه
ورغم كل اللي اتقتلوا غدر
ما احناش عدو
لما يتحرق علمك انت
وانت لاعب دور الشهيد
انا شاب وعجوز وطفل
انا اتغدر بيا واتقتلت
وانتو بدل الورد علي قبري
رميتو الف قفل
مكانش ده بالخطأ
كان ده بالغدر
مبقاش في ورد
مبقاش في عهد
مبقاش في ود
لما يموت اللي على الحدود
وهو واقف في رصرصة البرد
متجمد زي الورد في حيضانه
تايه مع التايهين في توهانه
مش فرحانين بدور الشهيد
ومحناش في عيد
ومش لاجل الورد
لازم يا نبقي .........
او نبقي ليكو عبيد

محمد عطية

09/01/2010

الي روح الشهيد (أحمد شعبان)

سكون

قلبي اللى بين ايديكي
مربوط بخيط
مغزوله جنب كفك مكان
قليل عليه السكوت
وكتير عليه الكلام
ولقلبك ف قلبي
جوايا مقام
و اللي باقي منه ليكي
مبيخافش غير من
الدهشة اللي ف عينيكي
بردي ف دفاكى
وموافقتى منك الرفض
الاصل ف الاساس
انى اكون مباح
اكونلك براح
و قلبي اللى مدعوك بين ايدكي
بيطلبي السماح
بلاش سكون
بلاش جنون
أنتي عايزة أيه
لما أحس ان كل حاجة مش ف بالي
لما تكون حقيقتي
وتكون انتي خيالي
لما ف نومي أحلم بيكي
وف نومك أحلم بيكي
سكونك بيقيد كلامي
وهمسك اشارة لجناني
مش بوحشك
ياللي في القلب مغروس لصورتك
الف صورة
كل حاجة فيكي تحير
يا أميرة
يا ضل ساكن وتايه و يائس
لو أنا سجنك فانتي سجاني
انا سطورك وكلامك
اللي مش موجود
انا ضل فوق ضلك ممدود
بس ليه السكون
ليه صمتك معدي الحدود
ليه البرود
بلاش الجمود
يا كل حاجة عرفتها وحبيتها
يا كل شئ ف الوجود
ليه السكون
وانا ضلي شابك ف ضلك
زي وتر مشدود
بلاش سكون
محمد عطية 03/01/2010

لحظاتك الأخيرة

بوصل دايما ف لحظاتك الأخيرة
و أرفض دايما أني أشوفك مثيرة
وأحب شعرك ديل حصان مش ضفيرة
بكتب ليكي دايما ف آخر الليل
أما تخلص كل الاحلام
و أكرهك أوي وانتي عاملة أميرة
بعشق فيكي الانجراف و آذي الاعتراف
بس خوفي مش بيخاف
من نورك ولا من عبيرك
ولا همس سحرك و تأثيرك
انا ضعيف ف الانفعال
مرتد عن وصفك مرتد عن همسك
يمكن أموت من الاقتراب
ومين مامتش من قربك
أجمل الاشياء ف نهايتها
وانتى الاجمل في كل نهاية شوفتها
دايما بتألمني بس بكون من الاول ألمتها
هدوءك ف النهاية من جمالك
بتوشوشيني ف الحكاية
تضليني ساعات و تهديني
انا هنا ف المقام
اللي فالت من الزحام
وانا مهما ألف ادور
و أجد ف التوهان
ومهما أبتعد أنا بأقترب
ولما أوصل إليكي أغترب
ف الدوران أحوال و أشكال
كلام منمق
ياما صبري هزني وياما صبرك هدنى
بعشقك لاني مش بطولك
زهدي فيا اللي باقي ليكي
ف لحظاتك الأخيرة بتبقي ساحرة
وساعات أميرة
أيه يعني حجابي مكشوف
ما أنتي مكشوفالي
بس ف النهاية مرين
مر أنك صبرت
ومر أني اليك ما وصلت
محمد عطية 27/12/2009

سؤال

محتاج أليك
لأول مرة بكتب ده
و لأول مر بحس بكده
أنت سافرت ولا هاجرت
و لا أنت طيف
ولا أنت مجتش من الأساس
ف الأصل أنا عايش ف حالة ضياع
بيك كملت لكن ما أكتملت
بعدك عشقنى الانقطاع
ولا عمري سبت جواك أنطباع
سبيلي مش مفرود ورد
ولا هو متحنيلي
ليك آجد بس أعرف
ليه وحدك شربت من نيلي
الوحدة وحدة لأنها مبتتقسمش
مرة ف الطعم
قاسية ف الوهم
بتضعف تذل و ترفض تدل
مقدرش أثابر أنا من غيرك
دلنى على مقامك و أجيلك
ف كل الاوقات والأمكنة
يا ترابي اللي ف قدميك
ينورني نورك جوايا جواك
يضل فيا زي ما يشاء
انا كلى و وحدي ليك بدون أتفاق
بدون مواعظ ولا حكم و لا أشتياق
سرابك قشور ودوري أجمعها
مخفي ف در ف زمرد أو حتى ف زبرجد
عمري ما أبقي زي جن سليمان
ولو بعد حين أفكر أتمرد
ثوابي ف عقابك
وجودي بيضوي عند حد بابك
أنتهى و أسترد
تلاميم وجودك
و أجهز نفسي لتباجيل حضورك
بس أنت فين
لو اشوفك ف غمض العين
بس مشكلتك أنك
ملكش تباشير
ونشوزك بيحد عن المألوف
وتبكي و أبكي و تضحك و أبكي
ف كل الظروف
و ارجع أسترد نفسي لما أطوف
ومقدرش أفتح عين و أشوف
بس أنت فين
مشكلتك أنك ملكش أوقات
يقولو عنك عدى يقولو عنك فات
سامحهم جهلة ميعرفوش
انا وحدى أعرف بس أجهل الجميع
جوايا مجوف جهري بيخوف
وسري كسير
وليه مصر تبقي زي أمشير
زعابيبك تلطف وترجع تقطف
شجر الجميع و ورق الربيع
بس انت فين
سرابي سرابك وشهدي ترابك
لفيت روحي حواليك عقال
وبرضه عندي نفس السؤال
مفيش حكمة ف عدم وجودك
بس ميمنعش انه في سنس جمال
حتى لو فاق الحد
حتى لو فاق الأحتمال
وأرجع اسال
بس أنت فين
هى دايرة واحدة مش دايرتين
خروجى منها بجد محال
و اسأل تاني
بس أنت فين
مع أن الاجابة موجودة ف السؤال
محمد عطية

15/12/2009

ماريونيت

مش عارف أدرك أيه الصالح
مني ليكي
ولا قادر أحط قلبي بين أيديكي
أنا زي العروسة الماريونيت
مهما تروح منك تيجيكي
حبالي ف صوابعك
مفيش ف أرادتى
حاجة عكس أرادتك
حاجة واحدة بس
مش ف أستطاعتك
أنك تخليني أحبك
بشتاق للمس الأيد تلمسيني
و أشتاق للهمس الدافي الحنين تهمسيلي
ولما ابعد وتتوحشيني تنديهلي
أرجع أليكي أتوه ف عنيكي
بس مقدرش أقولها بحبك
يمكن أفعالي تدل
يمكن ف حضنك بحس بالدفا
بس بحس برضك بالذل
هي حاجة غريبة
يكونلى ف حضنك مكان
شوفتي حد بيشتاق للحنان من الحنان
يشتاق بعد هدايتك للضل و التوهان
انا شئ معقد منتشي على طول
عمري ما حبيت زي الأصول
ترياقي من سمي
بس عليا أنا

مالوش مفعول
تصرحيلي بالعوزة و طلب الدفا
أحتياجك للحب اللي أختفى
متعرفيش أنك بتكلمي تلاتة جوايا
واحد أنا لا أعرفه ولا أنتي تعرفيه
والتاني ملاك جوايا أنتي بتحبيه
وتالتهم شيطان جوايا
لا أنتي شوفتيه ولا أنتى بتكرهيه
الغريب ان اللي الأخير هو اللي حبك
بس أنتي مش عارفة أنتي بتحبي مين
بس هو شاطر ف غزل العلاقات
ميهموش أيه اللي فات
ميهموش مين اللي يحيا
ومين اللي مات
و جاهين قالها زمان
ورا كل شباك ألف عين مفتوحين
و انا وانتي ماشيين يا غرامي الحزين
لو التصقنا نموت بضربة حجر
و لوافترقنا نموت متحسرين
عجبي !!!محمد عطية
07/12/2009

(الخط المائل من رباعيات صلاح جاهين)

ف قربك

ليه بتعاملني معاملة الند للند
وليه بتعاملني اكن الدنيا
مفيهاش ود
ايه يستاهل تجرحنى ليه
وكل حاجة ابنيهالك تتقتل تتهد
وانا بين آقدامك عبدك وخدامك
بعشق الرمل اللي بتدوسي عليه
انا مش جبان
أنا زي حصان من غير لا سرج
ولا لجام
بس أنتي سجانى
طوقى ونسيانى
من غرز ف قلبي حبك
وحده برحمته يقدر يداويني
ليه كل حاجة بحسها
بعيد عنك جميلة
ف قربك بتبقي مستحيلة
ومالهاش طعم
بتبقي وهم
ف قربك بتبقي نار
بحس أنى عاجز
مع أني ف الاصل مش كده
بحس أنى طيب زيادة عن اللزوم
وليه ضحكك بيبقي فوق العادى
مع أنى محموم ليه كلامك الحلو
اللي عارف أنه مش ليا
بيخليني احس أني مسموم
أنا مش ضعيف
ولا شئ طريف
ومش عاجز
بس كل الحكاية أني ف قربك
قليل الحيلة أحساسي معدوم
متخدر و متكدر
كياني كله مش بيتقدر
مع أني بغزلك الورد
وأبنيلك من قصوري تيجان فل
في بعادك عني بنكوي بنار فراقك
وف قربك بنكوي بنار كلامك
ببكي لأني سلمتلك
وأبكي أكتر لأني سلمتني
بقيت حاجة بتطوي
ملاذي ملاذك
أكونلك عرق بيضخ في فؤادك
من ضمن العروق
آستحالة أني اضمن أني اكمل حيا
وأنا معاكي
أني اضمن الدفا ولا الونس
بس قدري كده
أني ف قربك ابقي كده
منتهي ف الضل مش كامل
أحترق لما أقرب
و أحترق لما أبعد
بتوه ملامحي وتبدأ تدوب
بحسي ان جالي اوان الغروب
وف قربك بأنسي كل الدروب
اه لما القرب يجرح ويكوي
و ف قربك أنتي تنجرح كل القلوب
محمد عطية
06/12/2009

كسر القلب

لأن خيال الأعمى
مش دايما أعمى زي صاحبه
و لأن العود ده موجود دايما هنا
وأنا من غير ايدين
فمش هاعزفلك
غير بقلبي اللى بتشتهي أنك تكسريه
تفتيتيه زي حب السكر
وتستطعميه
أو أقولك هاعزفلك احلى بالناي
اللي بيوجع قلبي أكتر
انا هاروح منك فين
انا هنا ليكي
وانتى هنا لكل الناس الا أنا
معملتش ليكي حاجة خالص
بس ده قدري
ومحدش بيهرب من القدر
قدري انك تعتقي حبي زي الخمر
وتسقيه لغيري
مش هاقدر ألحن لغيرك
وانتي عارفة وانا عارف
أن صمتي أبلغ من كلامي
وأن اللي بيقتلني سلامي
وحدي اللي نجيت
بس من غير عيون
ما أنفعش صح
لاجل كده بعزف
وانا مكسور القلب
مفيش منك كلمة تطيب الخاطر
مفيش منك صقفة
او كلمة برافو شاطر
العمى مش ف العين صدقيني
العمى عمى القلب
الكسر مش كسر الجبين
الكسر كسر القلب
عودي بيقول اللي انا عاوز اقوله
و بيطول اللي انا مش بطوله
كفاية أنك ساعات بتحضنيه
بتدلعيه بتقوليله صاحبك أعمي مش زيك
وأنا بفرح لده
بس عودي مبيجرحش
مبيفرحش
عايش لأنه مش شايف زي
لا هو شايف وساكت
قلبه مش مكسور زي صاحبه
وليه عينين
مقدمهموش ليكي هدية
لحد استحقهم وباع
لحد وشمني على الدراع
لحد أشتهيته ف الخيال
100 مرة
واشتهاني ف الحقيقة
ولا مرة
مش بسأل ليه بتعمل كده
كل اللي بطلبه
خلى بالك من عيوني
خلى بالك من عودي
اللي لبعدي هيبقي عودك
مش هيعزف لحد غيرك
مش هيبكي لحد غيرك
هو مش أعمى هو شايف
وخيالي شايف
الاتنين في الوجود حبوكي
و ف الخيال حبوكي
عشان كده بقولك محدش يلمس عودي غيرك
و محدش يبص لعيوني اللي ف عيونك
غيرك

محمد عطية
24/11/2009

متخافش

مش عارف ليه خايف
مع أنى مطمن بجد لوجودي
ليه مش قادر أحدد
مع أنى بجد شايف
وليه نور شمعة واحدة
مبينورش غير لأتنين
محدش بيحزن علطول
ومحدش بيضحك علطول
ومفيش حد بيبكي لأخر العمر
وأكيد مش طول عمري
هافضل قابض ع الجمر
اللي بيمر بيمر
مفيش حاجة بتفضل ومفيش حاجة بتجر
أسعد شيء لما تفرح شوية
تحزن شوية
يبقي ليك يا سيدي هوية
متفضلش ف الممر
متفضلش هربان من حاجة لحاجة
مش لزماك
هي الوحدة حاجة مقوياك
أرفض تكون علطول جميل
متوافقش تكون لنفسك دايما دليل
توه يومين ده التوهان لذيذ
و أظهر الحاجات اللى حابب تخفيها
الحاجات الى نفسك أنك تداريها
و أخفى حاجاتك اللى حابب
أنك تظهرها و لغيرك توريها
تعرف تجرب تكون أسطورة ومش اسطورة
أنت مش بجعة جوا نافورة
أنت حاجة أهم أو حاجة أقل
تكون زي ما تكون
بس متقلقش متندهش
متفرحش متحزنش
والأهم أنك بجد متخافش
أنا مش بساندك أنت مش ضعيف
ومش قوي
عيش بس متعيش أوي
جرب تموت و متندفنيش
جرب أسرع حاجة لأجل تعرف
أن البطء حلو
أنت مش ممل
ودايما ف حل غير الهرب
ومتقلقش أنك قلقت
لان القلق شيء طبيعي
ايه أسوء من حياة زيها زي الموت
انك تخاف و الخوف ده مالوش صوت
صدقني كل حاجة ف الدنيا بتعدي و بتفوت
وكل حاجة بتموت
بس عمرك شوفت موت بيموت
يبقي ليه تخاف
محمد عطية
18/11/2009

اوفردوز

لو تتمني ان السحر
ده كله يبقي ملكك
يبقي ليه القلق و التبدد والملل
والدعا ساعة المطر
ما انت عارف أني بحبك أنا
مدمن عليك مدمن على القسي
وليه النسى واللي أتنسي
وخضة الضلمة وسط النور
والخوف أكنك وسط بحور
او طائر ف لوحة لفان جوخ
أنت مش عصفور ف ليلة برد
اللي حصلك انو انا
دفاك أنا و هنَاك أنا
سعدي سعدك
اتفاءل أنا هنا ليك
محدش هيمسح على جبينك غير أيديا
محدش هيداري عيوبك غير عينيا
لاجل عينيك
مرادك والجنى اللي بين أيديك
يبقي ليه القلق
و الغص اللي بتشرخ الجبين
يا حبيبي ده أنت انا
النجوم اللي ف السما
مبقولش نفسك تملكني
لأنك مالكنى من مليون سنة
أنا أنكتبت لك ف الكتاب
نصيبي من نصيبك
متتوجعش وحدك متتألمش وحدك
و الجرح اللي يصيبني يصيبك
بحبك متقلقش بحبك متنفعلش
عشان خدودك متوردش أكتر من كده
سلامي من سلامك يا دوختى من كلامك
بحب فيك هيامك
يا انسجامى ف انسجامك
زي نسيج خيط نسجهولي
او بوكيه ورد جيبهولى
غمض عينيك
يا لمس الحنان اللي بأيديك
لو تعرف بشوف أيه وأنت مغمض عيونك
وألم لك شعرك على جبينك
أنت مدهش مزعج ليا
بس مقدرش
مقدرش أشوفك محسش أني مش أنا
فبحق فردة شعرك على كتافي
لو موتي هو خلاصي
وبحق نوم عيونك ف عيونى
أنا مستعد
مش مستبد
بس خلى أخر حاجة أشوفها أنت
وأخر حاجة ألمسها أنت
و أغمض عيوني و أموت
وتحييني أنت
لأن أنت صاحب السحر
و صاحب الأمر وصاحب النهي
محمد عطية
14/11/2009

جوا العروق

لما بفكر أن أسمك ف تنى الحروف
و ف حضنك بوشوش جنانى
بسلم ليا ليكي
بخبي عليكي كل الوشوش
يمينك يميني
وسرابك وتيري
بتكسف أما بشوف عيونك
بحب أشوفك من غير نور
سحرك ف الضلام أكنه
بوبوء قط شيرازي ف لون الكريستال
يمكن حتة من الخيال
بيضوي العيون ويكوي الجفون
و ف السلام سر الختام
و ف السكات سر الكلام
وريدي ف أيديك
وريدك ف أيدي
تملى ينجلى عني الخشوع
ف زفة حضورك
تملى ينورني من جوايا نورك
تملى أمنى نفسي مرة انى أنولك
أنا أعرف أن الدلال لونه أحمر أو أزرق
حسب الحالات
مفيش حد كمل لمجري العيون وعاش
ومكنتش أعرف أن تسنيم ده نهر
و أديني عرفت و برضك عشقت وبرضك غرقت
يا روعة محلها منى أنها تمزعنى
مش بقول أنى بحبك فوق الوصف
يا أم الدلال درجات
سبلي اليكي متلونة بالأحمر زي الدم
بايه يفيد التيه و الحرمان
وأنتى عسلك قدامى محروم أنا منه
ليه ملايكتك مش راضيين يستنوا
مكنش قدامى حل غير أنى ليكي أهج
ليكي أفر
يا طعم الحاجات وهي من جنبك تمر
وأيه غيري ليكي مستنياه يهل
يشهد عليا عفار التراب اللي عليه كنت بمر
يشهد عليا صمت السنين
و الحاجات اللى تحَزن ترجع تسر
أشوفك ف لحظة أشوفك ف ثانية
أشوفك مرة واحدة ولو ف العمر
يندهلى أنده يصرخلى و أرجع
نفسي بس أسمع
أقول بس أيه
أقول أيه و أيه
لما جوا العروق أسمك بيجري
لما مراكبي قلبي بييجي لحد عندك
ويرجع يعاندني
ببتسم و أسكت لأن أنتي جوايا
عايشة معايا زوادك هوايا
عرفتي بقي انتي مكانك فين
وعرفتي كمان مكاني انا فين
متنتدهشيش لما أسكت وأرد عليكي من غير أنفعال
متندهشيش لما فراقك يزيد الوصال
فسبحان من خلقني للسكات
وخلقك يا ستي تنزرعي جوايا
في عروقي تصبي جواها الدلال
محمد عطية
09/11/2009

أولسايز

سامحنى لأنى معرفش غير أني أحبك
ف ودك و هجرك ف نارك و بردك
أنا اللى بدَل أنا على الطريق
بهديك زهرية مني من وردي
بهديك شوية من ضلي
بحبك في كل الحالات
معاك معرفش الندم
معرفش معنى للألم
مفتكرش أن هجرك بيكويني
بحب فيك الغموض
لونك بيحير عيونى
يا تري بحب المطر علشانك
ولا بحب الشمع علشانى
ما أحنا كلنا بنبكي لأجل نسعدك
لأجل تسكنا ونسكنك
مع أن أنتى ف الأصل ساكنانى
بتحب الروح المغسولة بإتقان
بتحب الشمع بإحجام
والمطر لما ينزل بإحكام
للجمال مآسي متمثلة فيكي
بس برضك بحبك ف كل الحالات
بستني كتير تيجي مبتجيش
بستناكي تحزني زيي
بس مبتحزنيش
حتى لو بحبك وأنتى لا
أنا قلبي أولسايز
واسع على ضيق
ليك حابب الونس
بأنسي الضي ف عيونك
بأنسي الوجع ف جفونك
يا أم الليالي الضي
والشعر مفرود ع الجبين
أنا قلبي ليكي بيغفر
حتى من غير دليل
مهما تعملي فيه
حتى من غير كلام
لأنى أنعكاسك و التماسك
لو بطول الشط هاجيلك
ولو حتى زاد الصبر أنا صابر
أنا كتبت كتير ومش عاوز أنهى
بس ف الآخر ف رسالة ليكي منى
ف القصر الابيض واحد بس مستني
صابر وحيد و بيغنى
الشمع حواليه كل القطع
و المطر حواليه بيرشرش و الندى
وستايرك جوا قلبه بترفرف وبتطير
و بعوده بيغني أغنية غناها منير
أنا قلبي برج حمام هج الحمام منه
وحدي للشمع والمطر بأقولهم يستنوا
ياللي عينيك كلام ليه الضلوع أنوا
مش قلت لك
انا قلبي لك سواح
فسامحنى بقلبي ومن قلبي معرفش
غير انى أحبك
محمد عطية
04/11/2009

(The Bold Words from mohamed mounier song Borg Hamam)

مفضلش

مفضلش غير الملام
وكلمتين والسلام
والنده جوه الروح
وراك فين ما تروح
متظنش ان الغلا بجد غالى
الا لما تشوفه كده
متستناش تحب ويايا
انا الحزين أوقات السعيد أوقات
الشيطان بس بجنحات
يفيدك الفرو ف الحر ولا يقيدك
بأيه يفيدك الحنان ف كلامى
مدام مش ليك
أنا أعرف غيرك كتير
وبحب غيرك كتير
أيه مبتحبيش كلامى
انا مش منزل من السما
مش خير أوى زي ما أنت فاكر
لا غلبان أوى
بس يمكن اكون شوية فاجر
أنا مش مخلوق من نار ولا فخار
أنا مخلوق زيك من طين
مش من صلصال
مليش أجنحة
ولا تكويني يسمحلى
أنى أكدب عليك
أكويك أضل فيك
أنكسك
مش أنا الحصان اللى أنت مستنيه
كلامي بيضايق مش زي الخمر
مبينسيش زي ما انت وصفت
زيه زي الجمر
ولا هو كلام مقدس
لأنى مش نبي
و زمن الانبياء خلاص انتهى
مش فلسفة أنى مش ليك
ولا حتى بحاول أنى أهديك
أيه تظن يحصل
لو أنت مت
أو أنا أتقتلت
أنت أو أنا مش هننهد
مش ده الشرخ اللي هيدمر السد
لأني مشوفتش حد بيموت ورا حد
كلامي مش تزويق
ولا كلام واحد غريق
أنت لو بردان
قولتلك مش حضني اللي هيدفيك
ولا حنية من قلبي هاديك
لانه بجد جوه قلبي
حنان وحب ليك
مفضلش

محمد عطية
02/11/2009

أرتباك

رغم المثول والتهويل
و أن هودج غنايا لسه مجاش
وغنايا يرويكي و يغنيكي
بجد مش مستحمل
القرب قرَب بس أنتي بعيد
الصدفة نفسها فيكي
والدم اللي ف الوريد
وانا دايب
فيكي مبكتملش بس ببتسم
جواكى روحى تنقسم
ومن الوانك أتخط و أترسم
يا أم الدلال و الانفعال
السر ف التكوين أن شعري
مبينكتبش غير ليكي
فكرت أني استرد روحى منك
يا منايا
بس شايف ان كده أحسن كده أجمل
أيه أجمل منك وانت بتغنيلي
وف حلمى عيون القلب
تاخديني ف حضنك الدافى
وشعرك مفرود على كتافي
يا أم شال أبيض متعصبة بيه
و أم خلخال وردي
أموت و أبقي أنا من ورده
أو أنه يضيع منك وأنا الاقيه
بثبات وانتي بترقصي
مدوخيش مني وأنتي بتهمسي
مش ناوي ان أكون لك ملاك
ولا انا رافض للهلاك
يا سحر مستخبي ف العيون
ليه قلبي بيتنفض لما أشوفك
و أنتي شايفة كده
ليه مش بتشوفيني وانا شايفك زي الضي
يا عنبر روحي مسكك زاد وغطى
بجد غناكي فاق الحد
يا أم الصيف زهر و زمهرير و سلسبيل وعيدان ريحان
علموني عينيكي معنى الارتباك
محمد عطية
31/10/2009

ملاك

انا انتهيت
معدش فيا طاقة للفصال
ولا عاد ف روحى لذة للوصال
أو للانكسار
أو حتى لدوق الذل ف الاطراف
ولا حتى رجفة أنى ف بعادك هاخاف
هافرح للوحدة و أبص ف الطل
كرهت نفسي وكرهت ليك الضل
كرهت شكل الحقيقة و الغرام
حبيت الندم
بس لا لقيته منك وجع والتباس
بيجري زي الدم ف العروق
يمكن كرهت وصفك آنى ملاك
ليك فعلا حابب الهلاك
الشؤم الألم
سدالى مفرود قدامك
يمكن يعقلك
مفيش ليا خلاص أجنحة
مفضلش غيري من المدبحة
ألضم من زمردي سبحة
أهى تنفعك
هى صحيح مش عقيق و لا كهرمان
بس تنفعك أكيد بعد الفراق
مفيش ملايكة تانى تجرحها
لان الدور انتهي
مفيش غير شيطانك اللى بيكرهني
وملايكتى اللي انت بتكرهها
بس خلاص انا معدتش انفع ملاك
بعد اما ليك نورت الضلمة جواك
اللي بعلم ربنا أمر متنورش
انت منتهتيش انا اللي انتهيت
أسيبك تسبح ف ضل أوهامك
أسيبك وانت سيد شيطانك
صلاتك أذي ورحمتك قسوة
حنانك غدر وعذابي لك نشوة
وانا مستهلش منك كده
ومستهلش أني أبقي ملاك
محمد عطية
19/10/2009

آمر من السحر

شايلك حمل جوايا
آمر من السحر آمر ما ف العمر
صعب اتخلى عنك
و روحي مدقوقة وتد فيكي
يا روعة شبكاني ووخداني للغرام والضل
حبك زي كرهك بيزيد لما بيقل
يا صورة انا لونها وأميرة انا عيونها
مخلياني للغدر ليه أختار رغم انه مر
عمر عدى على غرز سكاكينك
لون مشربيتك أحمر من دمي
وأيديكي لسه مزهزهة وردي
أستحالة يكون ندايا جف جواكي
أو كلامي الحلو يكون مش ليكي
يا بدعة متفصلة
آه بيخليني أتنفض
لما يجي مسك روحك
عنبره روز ف عيوني
ليه تسأليني على حاجة معرفهاش
انا مشوفتش الجنة أنتي شوفتيها ؟؟؟
ولو شوفتها ما أنا معرفهاش
معرفش غير دنيتي تايه ف حواريها
يا ام البساط معقودله 100 عقدة
والبرد يجلد فيا وانا بعيد
بس برغم التيه انا لسه أمير
برغم أن ف شعرك بقايا تاجي
ورغم الوله أنا لسه أنا
برغم أن ف أيديكي بقايا تكويني
اللحن مشدود على آخره
وانا ف حضن تعاويذك
تندهني من الشوك للورد حناياكي
وترجع تألمني من الوريد
يا ام الشعور الزين
وانا وحدي مستني
يا أم أسم مكتوبلي على البردي
من فضلك أمسحي فيا بواقي تراتيلك
بس بلاش غدر بلاش هجر
بلاش تكويني و بناري
بلاش تسحريلي ف صيامي
وبلاش تفكرني بيك ف بعدك
لأني ببكي وأتالم قوي
بفتكر غناكي وشرودي
دلعك زي القط الشيرازي
وبقايا نار مولعة ف عينيه
ومخالبه علامها احمر ف ضهري
يمكن سبيلي إليكي مختوم
خني غير خنك مع أنك تشبهلي
بس أنت أكتر ف الحب و الغدر
حبتني أكتر ما انا حبيتك
وخدت منك اكتر ما أنا اديتك
بس ليه تصرخ وانت بتدبحني
مش عاوزني على الاقل انفعل واصرحلك
أن أنت آمر من السحر
آمر من الحلو
آمر من الصبر
آمر من الحب
آمر من الحزن
ده حتى أنت آمر من المر
محمد عطية
05/10/2009

يا رب

يا رب أديني لاجل اعيش
طيب خلاص أشتغل متقولش لا
أشتغل قواد بيع خمر بيع نفسك
متقولش حرام أنت مش أمام
متظنش أن ربنا بيعاند فيك
ولا ان الشيطان مصطفيك
طول ما انت عاوز تعيش أرضي بالمكتوب
أوعاك تعيش مقلوب
متظنش أنك خير
ومجك عليه شفايف ورسم قلوب
وانت حاطط خلفية للاب توبك
صورة بنت عريانة
وانت بتحب صوت جبريل
وهو بيقري قرآن
ليه الغلط ف المضمون
لما الدنيا تقبضك وتفكر
تقبض انت عليها
لما نور عينيك
ينور لغيرك
لما تتوزع حتت
لما تعمل خير ف مجمله
يكون ناعم مخمله
يطفي نارك ونورك
تتمني ان حد يخونك
تتمني انك تعوز
تتمني ان الحرام ليك يجوز
وان هادي ف السبيل
مع ان أنت مش سوي
وطريقك كتير ملتوي
يا رب ان كنت بعصي
فبرحمتك قادر تردني
وبرحمتك قادر تضلني
ومش معايا ولا في حياتي
هاقول غير يا رب
محمد عطية
24/09/2009

لو

لو الحب كان بالزرع
كنت زرعت حبك ف قلبي
وشيلت حبها مني
كنت هديت جسوري ليها
ونويت ليكي نية خير
كنت طلقت من جوايا الطير
حبيتها وما قصرت
وانت ما أتغيرت
لأمتي للحنان مني تطلب
ولأمتي ليها انا اهرب
انا في حضنها وانتي ف حضني
يبل خدها دمعي يبل دمعك خدي
أبكي من عوزتك ليا
بس ف أيدي أيه أقدمه ليكي
غير كلمة حلوة
أضحك
وأنتي ف عياطك أصبرك
أضايقك ساعات زي ما هيا بتضايقني
تتمني أيه مني
دايما تقولي مش بأقولك حبني
بس متكرهنيش
مش باقولك قويني
تاخدني ف حضنك تدفيني
بس متكسرنيش
بطلب منها نفس الكلام
تحكم عليا بنفس كل شيء
هو البحر بيزيد لما يزيد المطر
يا بحري انا فيكي غرقان
ممكن ان اموت جواه عطش
بس أزاي اطلب منها ترويني
وانتي دايما بتديني
كلامي مش منمق
ده صريح بيوجع
للحب من القلب يقلع
لعبك ف شعري
وبوسك عينيا
معدش فارق هيا كوياني بنار عينيها
سايب سمها يجري ف عروقي
زي ما انا جاري ف دمك
يهون عليا أيه ويهون ليه
ما انا مش ليكي
وهيا مش ليا
بلاش ندم
بتبصيلي أه من غير بكا
لكن عيونك بتفضح المكنون
فساتينك و الوانها
مسكك ورمشك
عارفين انتي مخبية أيه
أه لما ينحسر ف القلب حبك
واتوجع يطلع مع الاهات صورتك
لو كان ليا ف الدنيا أمل
بجد مكنتش اعرف أعمل بيه أيه
بس بجد كنت هاتمني
؟؟؟؟؟؟؟؟؟؟؟؟؟؟
محمد عطية
23/09/2009