الأحد، 12 سبتمبر 2010

نفس النوع من الحزن السعيد



نفس النوع من الحزن السعيد
نفس النوع من السعادة لما تغمض عينيك
وتفرد ايديك
وتطلب كلام
وانا الاخرس اللي حروفي باهتة
في العيون
ولانك تقدر تنوح وتطلب تبوح
وتصرح انك عمرك ما كنت مر
وان فيه اللي آمر
وان انت حياتك زيادة عليك
واللي قبل منك ملهمش دعوة بيك
وتجدل ضفايرك وافضل احايلك
وترقص بعند ويرن خلخالك
وتمسني بشالك
وترفضني بحورك
وسفينتي جواك
وتبتسم بحزن
ولانها هي ابتسامة البلاهة و المكر
انت مش غدار ولا انت مخلوق من نار
بس في عيونك
بس في ايديك
بس من جمالك انا انتبهت ليك
مترفضش انك توافق
كده بسهولة
انا ف حياتك الاخير
وانتي في حياتي الاولي
لا عمر حزن حب السعادة
و لا الأمل زود الحياة
نهايتي ف البداية
وتعاستي مش نهاية
انكتبت جواك وقادر
اختار لك مداد غيري
لو تستطيع
لو تقدر تشتري من غير ما تبيع
ولو حزنت متحزنش اوي
وبلاش يبقي نفس النوع
من الحزن السعيد

محمد عطية
13/9/2010

الخميس، 9 سبتمبر 2010

حد الوفا


مدهوش من الوفاء اللي حل عليكي فجأة

مكنتش عارف اني مقامي مبني جواكي

وانا لسه ني ف الهوا

كان مجرد ترميز لحاجة ملونة

خطوطها بيضا حنينة

كان عودك أخضر

و دمي اللي سقا شفايفك

كان لونه قاني

كان نهار اردوازي

بطعم الصبح اللي ف العيون

وبطعم الروح الطاهرة الطيبة

كنت ناسي وافتكرت

بس لما وصلت

كان حد الوفا انتهي

مستحقش منك الحياة ولا حتى لثواني

ومستحقش منك الموت كذلك

انا اللي عايش جواكي ف زحام

انا اللي باني جواكي ليا مقام

انا كل المصلين وانا برضه الامام

.ادهشيني اكتر لما تعلني بكبرياء

ان الدنيا علينا احنا الاتنين

ضيقة

وانه مش ينفع نبتدي او ننتهي

وهتفضل حياتنا كده معلقة

اطلبي اؤمري

اسبحي ولو عكس التيار

الممتد مني ليكي

والمنتهي

ستني منك من الردود رد واحد

وبقلب جامد

اني انا انتهيت او ابتديت

المهم اتكلمي

باني ليا لو حتى بتتألمي

رد و ف ردك المدد

من غير الوجع ومن غير اللمع

حروفه مترتبة

من البداية وهو ونس

وف النهاية هو خرس

يا ام الحدود زيادة ف الامعان موجعة

و زيادة ف السكوت موجعة

سكونك مسلي

اكنه حد بيصلي

فاستغفري ففبعض السكوت

ف ناس بتندبح وتنوسم

فبكل الحدود اللي باقي منها حد الوفا

بلاش القسا

محمد ع

10-9-2010

3:30 صباحاً

الاثنين، 6 سبتمبر 2010

إلي حد ما


ولانك مش بتمري بالسهولة

اللي متخدش الحياء

ولانك معجونة من القسوة و الكبرياء

فمتحزنيش ومتدوبيش

و ع كل الكلام مترديش

افردي جناحاتك خليهم غطا

وانقبيني

خليكي جوايا

وانسي انك نسيتيني

واتبعي القلب الحزين

واتبعي الرمش الحزين

واتبعي نص السهم اللي انكسر

اتمني اني كنت مكونش

واحلمي بالبداية التي متخطرش ع البال

واتمني نهاية معكوسة

بس بلاش تبقي جوايا مغروسة

الحزن مش روتين

والعشق مش مدفون

ع العكس من حزنك

فرحك بيوجع اكتر

البشارة منك لونها زي الكتابة حروف

زي النوايا كسوف

مري بسلام واوئدي جوايا كل اللي منك

وارفضي اقلبي الماعون

امرضيني والعني

واصبري تبسمي

انشري قلبك تحت السما

شوفيني بقلبك اللي صابه العما

شوفيني وبلاش الغما

مري بيا واندهي

بلاش بحروف اسمي تلخبطي

انا كائن مجرد من العيون

مسُير محطوط بين نقطتين

وخط بيفصل ما بينا لونه احمر

وساكنه روح

مفرود له خط ع الجبين

بس النصيب غلاب

ومحدش بيعشق من غير حساب

محمد ع

22-8-2010

5:37 صباحاً

الخميس، 12 أغسطس 2010

متفكريش


متفكريش ان انتي العبد الولهان الطري
واني انا الشرس الجبار المفتري
احنا الاتنين في حالة الثبات
لا حد فينا عاش ولا حد فينا مات
افهمي لو لسه باقي فيكي عقل
حاولي تنسي اني انوجدت وفيكي انولدت
اعصي لو ليكي ف العصيان
ومتهونيش ومتندهيش
خليكي في حالك الاعمي الاسود الكئيب
صلي وصومي واتعبدي واحزني اكتر ما بتحزني
اوهمي نفسك انك مش السبب
اوهمي نفسك واتعجبي واتالمي
وقولي ليه
وقولي مين السبب
هو حب ينتقم فانظلم
وانا حبيت انتقم فسكت
وف السكوت رضا
وفي السكوت صباية متخبيين ورا اقنعة
بلاش اسئلة محرجة وبلاش تقولي قالي وقولتله
خرجيني من جواكي لو تقدري
عن نفسي انت جوايا مقدرة
هوة كبيرة فارقة ما بينا
انتي بتضحكي وبتتألمي
واحياناً كتير بتتندمي
وانا العصي في عيونك
والحد اللي بتكرهيه
نادمة انك عرفتيني
مش يمكن تندمي اكتر لو مكنتيش
افهمي ومتكتبيش اني مكتئب
او اني معدوم الحيل
ومترسميش نفسك بفستان فرح لونه احمر
ومتصبغيش شفايفك بروج لونه اسمر
ومتفكريش لان التفكير في حالتك بيوجع
محمد ع
8-8-2010
11:04 مساءاً

الجمعة، 6 أغسطس 2010

ولو نص ابتسامة


من الف علامة وعلامة
ومن العدالة و التلامة
ومن شطوط البحور
وريش الطيور
انطقي اتكلمي
بلاش صمتك الخادع الكذاب
افجري امكري
متبعينش بتلاتين فضة
متخلنيش سطر ف قصة
متحسسنيش بزوال الامل
خليكي شيء محتمل
استمري وبردودي الزرقا اكفري
ادفنيني ف تل
خليني على طول مختل
انا مش خريطون ولا ناسك ف الدير القديم
انا شوية هديم
ومشربتش من سيحون
انل اللي على نفسه
الوحيد بيهون
انا علامة ع الجبين
بيكي انتكس
بيكي انقسم
واوصل للنور ف الضلام
يا حكيمة زي الانبياء
وحزينة زي عيون جدودي
قاسية زي حدك وحدودي
ادهسي اعملي من تراب وصلصال
اعمليني فكرة وموال
اسهري ف ليل طويل
نهايته لما تغمضي
بس قبل ما تغمضي
اكسري التابوت
احرقي الترتال
فضيني من الخيال
اتمردي على نفسك القاسية واطلبي
اؤمري ان كنتي بتؤمري
والعني ان كنتي بتلعني
شدي خطوط كفك واتململي
وافردي البوز الحزين
انطقي بالوان الفساتين
خلى الحرير اطلسي
عدي على روحي وادهسي
لاجل انك تفوقي
وتهمسي
مشدود اليكي
مذهول وتايه
ارحمي وارسمي
عديني على كل خطوط الايد
وفناجين البن والعاب الورق
انا كل اللي جواكي انحرق
انا الكيان اللي لسه ما انخلق
اكفيني منك بالعلامة
اكفيني منك ولو بنص ابتسامة
محمد عطية
26/7/2010

الجمعة، 23 يوليو 2010

لايق أكتر ع الحياة


انا من غيرك
لايق اكتر على الحياة
او هي لايقة عليا
أعندي اكتر واتأكدي
ان اللي باقي ليكي
مش هو اللي باقي ليا
اعمليني صليب لاني في نظرك استاهل كده
افردي اطواق الورد حواليا
ادفينني على شطك
خليني نقطة من خطك
اعتبري ان شنقي من حقك
مزقي مني الحاجات الزيادة في عيونك
خليني ما استهلش اني المس ايديكي
اعلني اني عاصي وعصي
انا مندهش من ان باقي مني
شيء بيشدني ليكي
باقي مني جزيرة وحيدة ضلمة
نورها في عنيكي
مندهش
اني لايق لسه ع الحياة من غير ما اشوفك
ولا تشوفيني
ولاقي جوايا نبض
وف عيوني غمض
عذري ان الحياة من غيرك متتعاش
بس النصيب مر
بيجرح مكان ما يمر
انا مندهش من انك لسه قادر ع الحياة
رغم الالم
رغم الظلام
حنانك بيقل مع طول الطريق
احنا مش اصدقاء
بلاش تزوق ف الكلام
لاعمرنا ولا هنكون
اتت زي البحر قاسي وحنين ومجنون
ملكش شط عليه اخط
وابتدي المشوار
انا وجودي ناقص ف الحياة من غير تماثيلك
انا اعرفك من غير ما تجيلي ولا اجيلك
انت منفرد بتلات اشياء
بانك مندفع اكتر من اللزوم
وبانك منتصر حتى لوكنت انت مهزوم
وان طموحك زي النجوم
وانك لايق اكتر ع الحياة
وانك بتحب ع العموم
وان طريقك مفيهوش غيوم
وانا الغبي اللي فرطت فيك
خليت لك جوايا
اكتر من اللي ليا بقي كلي ليك
امسحي من جواكي طيفي
لو تقدري ؟؟؟
محمد عطية
21/7/2010

سحر الحالات


لان كل الحالات بتنتهي بنفس الحالة
المملة من البرود
و لأن دفاك مش محتاج جمود
ولان اشواكك اكتر من وردي
ولان كرهي ليك اكتر من ودي
متسافرش جوايا اكتر من كده
عشان جوايا ضياع
ذهاب بلا عودة
جوايا غرق وشروق مالوش غروب
وكتاب من غير ورق
وعيب مليان عيوب
وانت محتاجك أوي
لو تعرف ان قسوة الوحدة
في البرد في التلج
في شعور انك وحدك ف الطل
من غير ولا حتى ضل
حتى ضلك
اتوانس بغيرك
وسابك تنذل
حتى اميرك مبقاش اميرك
متنذهلش
حتى اللي جوايا مش ليك
بالتمام
ساعات الكلام بيبقي بالخصام
متتمنعش عني بالقناع
حنانك من خداع
بلاش تحضني بالجوانتي
متخافش على ضلوعي منك
بس بلاش تجنى
بلاش قدامي تخوني
خوني بس على انفراد
بلاش البجاحة في الكلام
بس خليني اقوله
متمزقش نفسك اوي جوا احضانها
بلاش تظن ان مفاتيحك جوا بيبانها
متعشقش اوي عشان متكرهش اوي
خليك حنون وليك ف القسا
مترويش عيونها بالحنين
لان يومها عندك بالسنين
ويومك عندها بالثواني
انت مش مليك
ولا انت ليها أله
متتخايلش بالبله
ومترسمش الوله
لانه دور مالوش لزوم
نصيب ليك مش مقسوم
انت صورة ناقصة ليها
انت ريشة طايرة بيضا
قدام عينيها
بمرور الوقت
بتبقي باهت
بتبقي مطفي بعد الضي
بتبقي تايه بعد اليقين
مهياش سعيدة ومانتاش حزين
متبتش في الايدين
بلاش تشوف صورتك ف العينين
لانك بتبهت كل يوم
عن اللي فات
ولان سحرك محدد باوقات
طلب الحنان
وسحرها مستمر
ف كل الحالات
محمد ع
9-7-2010م
4:13 صباحاً

صبر روح


تايه وسط السطور و الورق
اكني عاوز اشوف وقت البشر ما انخلق
السطور و الكتب و السحاب
كل شيء معجون من ماء و تراب
يا ربنا ما احوجنا الي نعمتك
وكل شيء مرهون بقسمتك
كل الفتن و الوشوش اللي ضد بعضها
منين اصدقها ومين احسها
مين السبب
وليه العجب مين كتب ومين قتل
مين حرم و مين شجب
هو زورق وحيد
وهو رب واحد للعباد
التلال من البشارة مكدسة برحمتك
قيمتنا يا رب ان احنا بشر
اتخلقنا بقلوب مش حجر
نعبدك و نحمدك
وان نسينا يا ربنا مبتنسناش
رزقك جاري في الميعاد
وان كنا احيانا كتير منستهلهاش
بس احنا ارواحنا صابرة
متشوقة للقا
يا رب ارواحنا مننا متعجبة
اللهفة مش قريبة
بس عاوزة الصبر و الصبر من المفاتيح
والروح ليها الصبر الصريح
يا رب احنا من المجاريح
احنا من الناس المضلمة
محتاجين نورك يا رب
محتاجين عطفك لاجل نوصل للطريق
محتاجين نصبر
واليك يا رب بارواحنا نعبر
من عرفك لم يضل ولم يختل
يا ربنا يا خالق السماوات و القمر
منزل الماء ومجري المطر
ربنا يا رازق العصفور على جذع الشجر
نقدر برحمتك وبصبرنا نبقي بشر
مش ملايكة ولا انبيا بس منبقاش زي الحجر
بعدلك يا رب اللي فينا أمر
توهتنا يا رب لاننا عنك بعيد
وانت نافخ من روحك ف الوليد
ومهون الشديد
صبر الروح
بيخلي الانسان يكون من جديد
اصبر واحتسب
امل ولربك انتسب
فبحق القمر والبلد
بحق الناس والصمد
اهدينا يا رب لان كل شيء مرهون بقسمتك
وبرحمتك ارزقنا يا رب جنتك
م ع
6-7-2010
5:25 صباحاً

أرقصلك ؟


التواضع اللي بيخليني ارقصلك ف الخفا
والحنان اللي مستنياه منك و الدفا
هو السبب اللي بيخلي روحي تشف
ومنك اخاف
ونبعي يجف
وارقصلك بحب رغم القسا
هو الشقا جواك مش شقا ؟
مش قلق لما بكون بين ايديك ارتجف
شيء طبيعي
والطبيعي تركيزك ف حركتي جوا الرقص
بتلعني لمستك
وتحييني نظرتك
بترفض ارقصلك ع الكتب ؟
لا الكتب نفعتك
ولا انا هاطول بيهم السحاب
ولا برقصي ليك هتغير المكتوب
انت وانا بني ادميين مليانين عيوب
ترابي معقود ف ترابك
روحنا واحدة
و بيمزجنا جسمين
بس انت مصر اتلوي قدامك
واقدملك صك غفرانك
متندهش لما ما تطولش السما والنجوم
متندهش لما تكون في يمي وانت مبتعرفش تعوم
منتاش جاهز وقت اللزوم
انت المنتصر بس برقصي هتبقي مهزوم
سبني ارقص
واكتب انت
جرب تعيش محروم
سبني اغني وعيش بحلمك
ف دنيا غير الدنيا
سبني فيك انقتل
متبقاش ممل
سبني افرد جناحاتي
وارقص لحد ما اضل
اتوه وانخلع جواك
يبقي جزء من عيونك رقصي
صفحة ف كتبك
يا مستبد
بلاش عيونك تتابع بشغف
ومتحسسنيش بانبهار
وبلاش لمساتك اللي بتحرق مكان ما تمر
وبلاش كمان تبتسم
انت مش شهريار
انا رقصتلك لاني عاوزة كده
مش انت اللي أمرت
وانا بسحرك كفرت
بس انت انسحرت
مش باقي ان ارقصلك
لاني فيك انا حييت وفيك انا انقتلت
م ع
1/7/2010

حياة من غير ملامح


جوايا جاي واللي جايلي رايح
مش محتاج جمال ولا محتاج ملايح
ولا حظ ولا دهب في صفايح
محتاج اكون انسان مش تمثال
ولو كنت ونسان
رسالتي اكون بني ادم
اقسا و اسامح
اغدر و اصالح
بس اكون ف حياة ليها ملامح
واني اترحم وارحم
ده الرحمة في سلام الايد
الرحمة في لقمة مش ليك لغيرك
الرحمة ف العطاء
ان تكسي وتكتسي
تلتحم بالبشر في خير
الرحمة ف الوفاء
مش فاضل ف الحياة قد اللي فات
فوقوا بقي من السبات
بتحبوا التراث من الحياة للممات
ربك حنين على العبيد
رحيم بخلقه
لو فين بيرزق العصفور
وكل حزن بعده اكيد سرور
تل الحبور من عند ربك مبيقلش
ده كل يوم بيزيد
اللقاء له ميعاد
والوصال مالوش حدود
احنا عرفنا ربنا برحمته ونعمه
احنا اتخلقنا فرادي عشان مسيرنا للقاء
وفي قضبان سجنك باين الوفاء
متكسرش القضبان لانه مفيش قضبان
جوا قلبك فيه تلال حنان
ثق في ربك ثق في عملك
واعرف ان ربك هو مجمع الاحباب
هو اللي خلقنا في البداية من تراب
الراحة بعد التعب ليها طعم مختلف
لو تتفق معايا او تختلف
كل شيء هو كل شيء
المهم واحنا بنبص له
نبينا ابراهيم عبد الشمس عبد القمر
وف الاخير عبد
وفي النار صمد
بأمر ربه
وربنا هو الاعلم بالاحوال
خلقنا بني ادمين لكننا اشكال
هي صوابعك زي بعضها
حتى ايديك مختلفة وانت بتضمها
انت ولا شيء غير اللي انت شايفه
حاسس بالضمور باني كل يوم بقل مش بزيد
حاسس اني بحزن وانا سعيد
زي الشمع نقطي خارجه مني
وانولد منه بني ادم جديد
بس مش بكون تماثيل
ومليش في السحر و التراتيل
انا وحيد وهافضل وحيد
زي جسم واحد له الف ايد
مكتوب عليه الصفحة التانية اللي لسه معشتهاش
ووفيتي وخلي اللي لسه معشرتهاش
يمكن اكون اخطئت اني جيت في الوقت ده
بس مين يملك شيء
محدش يملك غير اللي الي زوال
وبما ان دوام الحال من المحال
وربك ضارب الامثال صاحب المثقال
يبقي نأتمل اننا نكون
يبقي نتوه وجوه التيه واثقين من الوصول
بس عيش حياتك
من البداية للمنتهي
زي ما في الدنيا حنان
في كمان قسا
بس في الاخير اللي بيبقي هو الوفا


محمد عطية
25/6/2010
اهداء الي محمد عمر
المغترب داخلي

الاثنين، 21 يونيو 2010

نور القلوب


يا ضلام حل الغمام
مقولتش انا من اهل التقوي و الصيام
ومنويتش احرم حلال
ولا احلل حرام
انا مكتفي بقسمتي
بدعوتي ليك يا رب
يا رحيم
مش محتاج في الدعوة واسطة
ولا محتاج شيوخ ولا مقام
المقسوم ليا خير ولو كان فيه شر
مفيش منك يا رب حاجة تضر
بحق النجوم اللي بتسبح ربها ف السماوات
وبحق نور القمر في الليالي الحالكة
الطيبة منك يا رب قدرها لنا
ارحمنا من قولة الاهات
اجعلنا احياء
متجعلناش من اهل كربلاء
مش نسمع نصم
ونحوش نلم
ونخزن المال و نكتر ف العيال
ونندهش من قسوتك
لما تحن علينا بغضبك
لما ننسي حق اليتيم
عمر الدين ما كان غريم
هو صراطك واحد يا رب المستقيم
مشوفناش الانبيا و لا الصحابة الاوليا
بس احنا بنحس بنعمك يا رب
في الحياة
ف اللقمة الاخيرة ف الطعام
ف الحنان ف رحمتك ف السلام
ما احوجنا لطريقك المفروش بالنور
ما احوجنا لرحمتك ف القبول
ينفعنا فيه ما نمتلك
وانت يا رب وحدك الملك
اصحاب الالباب يعبدوك يفهموك
خلقتنا ف الارض و استخلفتنا
خلينا شاهدين على نفسنا
انت البداية واليك المنتهي
عمرنا اخره الحساب
قبر ضلمة او نور
حسب الدور
عيشت صح نولت الصلاح و التوبة و الغفران
ولو كانت حسناتك حفان
يا رب وحدك عالم النوايا بتحاسبنا بالمثقال
ما احوجنا الي رحمتك
ما ابعدنا عن جنتك
منملكش غير الدعاء
ياللي عرشك ف السماء
وخالقنا كلنا من ماء
وانت الدواء لكل داء
ربي قال اعملوا
صلوا و صوموا و ارحموا
بلاش بنعمه تكفروا
اتذكروا قوته وضعفكم
اتذكروا رحمته و قسوته
ثوابه ف صوابك
عقابه لمن خطى
متكونش زي الشيطان
اللي رفض يسجد فانوصم
خليك زي ادم واعرف الاسماء كلها
ربك وحده برحمته
يغفر لك الذنوب
زي ما امر الريح بالهبوب
بس انت ابدأ وانوي انك تتوب
هتلاقي وحدك وصلت
لنور القلوب
م عطية
16/6/2010م

ناي كريم


صوتي مشروخ
رايح مني روح
وجهلك بيا واجع صريح
وانا واحد صحيح
مقبلش القسمة على اتنين
جوايا ناي وكمان
نايي طيب لكن لئيم
مقبلش الظلم ولا الضيم
جوايا زحام
وقلب حنين و قلب رخام
ليك جوايا صحيح مقام
بس انا الولى وانا الامام
وردك طارح جوايا طرح
عنادي ف حبي
مش محتاج اي شرح
وانا من العبيد الغلابة الاتقياء
مقبلش اي وصف
وجوا كهفي كهف
ودفايا محاوطه برد
عفوي مش رضا ولا فضل
ولا انت ليك عليا
القول الفصل
الزيادة عندي ف ان لما بقل
بختل
ببقي زي الخيال زي الضل
محتاج اعيش الحياة
محتاج اعرف المي ومنتهاه
لحن نايي كريم عني
لحن نايي بيتكلم عني
هو الوفي وانا السراب
هو الملك وانا من الاعراب
تيجاني منه وسهدي ليه
نايي جوايا محتاج اني اراضيه
محتاج منه لمسة طيبة
حانية دافية طعهما
ممكن ميكونش طعمك
بس انا اوفي ليه
هو الحقيقة المجردة لما اندهش واختل
هو جوايا ليا الحل
نايي عزفه من لحمى
ومن دمي
ومن همك ومن ضيمك
م ع
14/6/2010

لَوْ حَكَمْنَا نَبِيٍّ


وَلَوْ حَكَمْنَا نَبِيٍّ
وَلَوْ نُوْرَ لَنَا شَمْعُ فً مَوْكَبِيِّ
يَا عَجَزَةٌ
يَا تُرَابُ مَدْهُوسُ
مُشْ حَتَّىَ طِيْنٍ
وَدُمُوْعٍ مَحْبُوْسَةٌ فً الْقُلُوْبُ
شَمْسُنَا وَحْشَةِ سَاعَةً الْغُرُوْبِ
انُتِوً مُشْ عَاوْزِيَنَّ لَا تَوْرَاةِ
وَلَا انْجِيْلُ
انُتِوً اصْحَابِ الْقَلْبَ الْعَلِيْلْ
اعْبُدُوْا الْمَالِ
وَلَوْ مَكَانْشْ حَلَالٌ
اقَلَبُوا الْمَاعُوْنَ
انْحَرُّوْا نَاقَةُ صَالِحٍ فَ كُلُّ صَبَاحْ
رَدَّدُوْا وَرَا الْاذانَ
انّ حّىَ عَلَىَ الْفَلَاحِ
مِنْ غَيْرِ سَمَاحَةِ فً الْعُيُوْنِ
وَلَا طُهْرٌ فً الْقُلُوْبُ
اغْسِلُوا الايدَينَ مِنْ دَمِ الْمَسِيْحِ
بَلْاشْ تُنَافِقُوْا بِشَكْلٍ صَرِيْحٍ
شَوُّفَوُّا فِيْنْ الْطَّيِّبِ وَ ادْبِّحُوهُ
نَافَقُوا الْقَوِيُّ وَ الْمَرِيْضُ اجْلِدُوَهُ
مُتَخَلُوّشِ فِيْكَ ضُعَفَاءُ
لِانَّكُمْ كُلُّكُمْ ضُعَفَاءُ
كُلُّكُمْ اصْحَابِ عَاهَاتٌ
لَا نَافِعَ فِيْكُمْ نَبِيّ
وَلَا سُوْرٍ وَ لَا ايِاتُ
اعْبُدُوْا الْطَّاغُوتَ
وَلَا الْعِجْلَ الْلِيْ بِيَخُوّرِ
صَلُّوْا وَانْ كَانَتْ صَلَاتَكُمْ لَا تَجُوْزُ
لِانَّهُا وَلانِكُمْ فً مَاخُورٌ
مَفِيْشُ فَرْقَ بَيْنَكُمْ وَبَيْنَ الْيَهُوْدِ
غَيْرِ انْ الْيَهُوْدُ مَلْعُوْنِيْنَ
وَانْتُوَ الغَلَابَةً الَّاقْوِيَاءً
الْمَسَاكِيْنِ الْمَسَاجِيْنُ
يَا بِشْرُ هَجِيْنُ
الْلِيْ بَاقِيْ مِنْكُمْ
اشْبَاهٌ مِنْ حِطِّيْنَ
قَالَهَا الْامَامِ مِنْ زَمَانٍ
الْغِنَىْ فً الْغُرْبَةِ وَطَنٌ
وَالْقُرْبُ مِنْكُمْ وَهْنٍ
وَ الْفَقْرِ فً الْوَطَنْ غُرْبَةَ
يَا عَرَايَا امَامٍ الْوَلِيّدِ وَ الْصَّبِيُّ
بَلْاشْ ايْمَانَ كَذَّابٌ
بَلْاشْ تَدِيْنُ وَصَلَاةِ
وَانْتُوَ مُسْتَنّين الْحِسَابِ
كَلَامِيَّ مَرْدُوْدٍ فً مَطَلِبَيْ
حَتَّىَ لَوْ حُكْمِكُمْ نَبِيٍّ
مَ عَ
8/6/2010

حياة خيالية فوق الحد


المطر ما انهمرش
لما عدا السحاب
والفؤاد هوي وضل الطريق
مكنتش ليا جوايا الرفيق
دورت عليك فوق السما
وتحت التراب
عشقتك ف الخيال طيف دافي
و ألمتني ف الحقيقة
كأنك حمل فوق كتافي
انت المنتظر في حياة بعيدة
ليه خطوتي ليك قد شوقي
وخطوتك ليا وئيدة
انا مش خيال
انا مش وهم ولا ابتذال
انا مش صور ولا كتاب جواه سطور
ولا انت طاقة نور
حياتي نصيب
انا شيء غريب
انا ملضوم جوايا غيري كتير
فرحان بأني مش لاعب دور الأمير
ليه ادور اكتر ف العيون
ليه ما انمش زيك ع الجفون
حياتي حياتك فوق الاحتمال
انا مش بليد ولا شيء عنيد
ولا انت حوزت كل الدلال
ليه كل ما يبقي ما بينا طريق خلا
تحط انت سد
انا مش حقيقي للدرجة
ولا انت حياتك خيالية فوق الحد
ليه لما ابني نفس جواك
الاقيني من عنادك انهد
دور عليا وفتش لان الطريق ممتد
عنواني جواك ميعرفوش حد
ومن نوري نور شموعك
تدفيك ف الليالي البرد
طريقي ف طريقك مش محتاج انك تترد
ومش محتاج منك رد
غير اني طريقي اليك
ميعرفوش حد
م ع
6/6/2010

ما أهون


ماعوني وان كان نضب
قلبك وان كان عطب
وقلبي وان كان غضب
فان لسه ليا فيك
دوري ف دورك حصل
ونبضي من دمك وصل
ما ضليت الا اما اشتهيت
وانت شيء مش مكتمل
وانا شيء مش محتمل
انا جوا الجفون
انا اللحظُ اللي ف العيون
عمري ما أهون
لسه جوايا جواك حكاويك
لسه ناقص منك كل اللي
ليا ليك
ظنوني ظنون
دمعك بيزيل الهموم
ما محي الاحزان
غير حزنك
انا وان كنت حقيقة
ففي اصلي خداع
شرك وانت وقعت فيه
وبعد الصراع
دمعي حزين لاجل انه بلك
وقلبي حزين لاجل انه دلك
وكلي حزين لاجل انه ذلك
انا جوايا نار وجيش و حصار
عبيد وامراء ملوك
سحر و دلال
قوة و جمال
غضب و انتقام
ومرارة مالهاش وصف
مفيش طعم خالص للخسف
انا اللي ف المبتدأ
انتقمت و ارتويت
ما ابتدتيش انت غير لما
انا انتهيت
محمد عطية
2/6/2010

عشق الغيب


حداكي حد اللوم
و نوري نور الغيوم
مستمرة ف رحلتك
موجعاني ف طلتك
حياتك كاملة بيا
وحدك ناقصة بيكي
مندهش منتمي
لحاجات فيكي
بيا شوفتها
ندهت صوتي
ندهني صوتك
عمري هو اللي كان بيفوتك
مرتجي من العفو ليكي
كهفي مظلم من غيرك
حسيت بالوجع
و بضي اللمع
وباليقين الحزين
الخفي فيا الدفين
وف عز غربتي و هجرتي
شدني ليكي الحنين
شوفتك ف العيون السود
شوفتك ف خفا الاخدود
شوفتك ف تعريجة
ف خط من خطوط الايد
ف قربك اللي منك
ومن ضلك ما ارتويت
وآسف حراسك الماريونيت
ف جبال حنانك وفا
ف جبال حنانك دفا
طريقي ليكي مسحور
باينة لي ف البنور
ف شط احزانك
مراكبي واقف ليا
ف عز الشموع
اللي مأثرة فيكي
ف عز ونسي بيكي وفيكي
زيدي الخديع
امكري بيا و اعلني
اعتقي من اللي ليكي نافع
اللي ليكي يكون شافع
ان خفوتي ف ظهورك
و سفينتي ف بحورك
وان كانت عاشق
عشق الغيب الجميل الموجع ف الخفا
ف عشق الغيب
المنتظر منه كتير من القسا
ف حدوده بين عنيكي
وف ايديكي ليا وحدي الدفا
محمد عطية
1/6/2010

فضل



انا غزلي بره الكتب معشوق وعاشق
منبهر بجمالك المتفرق بين الدواوين
متفردة يا ام الشعور الزين و الشعر الطيب
متكحلة بكحل تخجل منه العيون
برموشك الغجرية اللي دابحاني
يا صفحات صفاتك جوا كتبي
وتقليب آهاتك جوا الضلوع
فاردة القلوع
سفايني غارقانة قدام شطوطك
وخمري مسفوكة تحت اقدامك
بعلامة صلاتك اللي يندي لها جبيني
اخشع من نور عيونك
واخضع لنول الايدين
اغزليني صلي بيا و اسحريلي
اخرجيلي من الكتاب
بلاش عذاب
بلاش التوه بين السطور
بلاش الغرق جوا البحور
بلاش الخطب اللي منها بنكسر وادور
اطلعي و اظهريلي من الغيوم
من السحاب
او حتى كوني قشرة من الدهب
ف اكوام تراب
افضلي و اظهري
بلاش الخفا
ف الكتب قالوا انك موجودة
وعنيدة
قريبة و بعيدة
دورت عنك طول العمر
واما قربت التقيتك
بين سطور كتبت نصها
وكتبتي انتي النص التاني
كان كلامك بيشبه كلامي
ولان اختلافنا فيه شبه
مكنتش عشقت
فزيديني حروف
اطلعي من كل الكتب
اللي علي كل الرفوف
اتكوني واتدللي
من يملك مكرك يملك الوف
ومن يملك عيونك و يملك رموشك
ميرضاش بالوقوف
انا جوايا فضل
وانتي جواكي فصل
انا جوايا امر
وانتي جواكي عمر
انتي في اي شيء
ليا وفيا وعليا
ليكي فيه حكمة و عدل
م ع
24/5/2010

رحيل


لما تكون انت الطريق
وانت الرفيق
انت العلة ف الاسباب
وانت السبب ف الترحال
تدور ف العيون
وتبحث ف الجفون
تبقي مراكبي ف قارب حياتك
تخزن ذكريات من الزمن اللي فاتك
و تمسح يا سيدي
وتسافر ف وريدي
ويقولك الجميع
روحنا وتوهنا
ضلينا اكتر يا سيدي
حسينا بوجع الجبرتي لما قتلوا ابنه ف النهار
مش مستحق القعاد قد ما مستحق الفرار
الحلاج رموه صلبوه
حتى البخاري عاندوه وكفروه
بلدك يا سيدي كفرت المتنبي
كافورها يا سيدي
ركبها وساح ف الخلايق
محدش فيهم اضايق
بقولك يا سيدي
انا مهاجر
معرفش رايح فين
لبغداد ولا سمرقند
بخاري ولا بلاد الهند
اي بلاد مفيهاش حكمة من الحياة
هاحط فيها الرحال
وهانهي فيها الترحال
بعيد عن هارون الرشيد
بعيد عن حكم العبيد
ولما اوصل يا سيدي
هاقولك تقول الحقيقة
وتبقي شيخ طريقة
واطلب من العبيد
الهجرة بعد الوعيد
ويبقي ليك مريدين
يتبعوك زي مالك الحزين
من غير ما تعبد عجل
وماليش اخ اسمه هارون
ومعنديش مال قارون
بس انا راحل
هجرتي للحقيقة من غير الوجع
من غير الضي من غير اللمع
م ع
17/5/2010

الأحد، 16 مايو 2010

مين انا


انا الملك ولا الرعية
انا باقي منك
ولا انا اللي باقي ليا
انا اللي باقي من سحرك
ولا انا اللي مالي دية
انا مغول ولا التتار
ولا انا بغداد تحت الحصار
انا مش أذي ولا انا الخير
مش جماد وعمري ما كنت طير
انا مش هاضل وف ضلالي اهتدي
مليش مقام مليش حجام
مليش كيان ف موكبي
انا زي السبيل ومالي دليل
ولا انتي الجازية ف جنتي
عمري ما كنت شهريار
ولا كان عندي سياف
ولا انتي عندك جني
منه انا هاخاف
مش واقف على ابوابك الخضرا
مستني القبول
انا انعشقت لحد
ما صابني الذهول
انا ابن ادم لحم
روح و هم
انا غويط غوط اليم
انا مين يعرفني قدك
وايه اللي جابني حدك
انا مش سندباد
ولو شايفاني كده
ولا انا عاجز عن الكلام
انا اللي مطوي بكلمتك
منطوي خايف من طلتك
مديلي أيد
بلاش شغل الوعيد
انا اللي طول عمري حيي
معاكي ضل
جس أنه زاد مع أنه قل
بانله ضعفه الخفي
بانله نصه الوفي
وبانلي اني مش صفي
ولا انا بارادتي مصطفيك
انا شيء و حد و جماد
مقسوم اليك
انا ف كل البلاد
و ف عيون العباد
أخترت شطك لأجل أني أرتوي
تهت وعطشت بعد الروي
يعد الهنا
تهت من جديد
وبكيت من جليد
وانا توبي مش مشقوق
انا ليا فيا حقوق
انا كل اللي لسه معرفوش
واللي لسه انا مشوفتوش
وانتي كمان مشفتيهوش
انا الليلة التانية بعد الالف
انا يمكن اللي ماشي
وحدي للخلف
انا القبض و انا الونس
انا المسجون وانا الحرس
مين انا
سؤال مل الاسئلة
جوابه ف ورودي
و ضلي و شرودي
يا سؤال محير
دافي وحنين
بيألم و يسكت
يتكلم يقل
و يزيد و يختل
مين انا بسأله سؤال
بساله وانا ف الطل
يمكن ليه اجابة
ف الحياة
ويمكن يكون سؤال
مالوش اي حل
11-5-2010

سندريلا



يا ستنا ف كل الامور
يا ستنا ف الحيرة
و التوهان
بديعة اساليبك
جميلة تراتيلك جمال البخور
فيكي القرب موجع
والبعد و الله موجع
يا كل الاسماء و الصفات
وندا المطر الرقيق
انا ف بحرك يا ستنا
غريق
تفاصيلي متهمش اي حد
غيرك انتي
انتي الحقيقة المطلقة
والعشق ف الاطياف
و اللطف و المكر
والخجل الدنى
ما ابعك عن قربي
ما اقصاكي عن مطلبي
ف الهنا
منتمي مني اليكي
رافض قادرة تبلي ريقي
وسايباني ف عطشي
جامح
مين يدلني مين يصارح
يا ورد و طيف
بكل الملامح
يا شهد كل الملايح
يا مديح الخلا
يا صريح لضريح
يغادر
رافض يسافر
موغل مني فيكي
مفضلني ع الغمام
وفالت مني المام
ميتهوش عنك ف الزحام
انا قلبي اللي حبك
وهو من رخام
فيكي داب و تاب
فيكي انحيا
حب و استحى يقلق طيورك
سقي ما اشتكي
حب مطلعك ومظهرك
يا ستنا انا بعشقك
دايب عند اللزوم
فارس قديس ف حربك
انكسر و ابقي مهزوم
يا ندا لشجر الكروم
امتي الظهور
وليه بتحبي لعبة الخفا
وانا والله ليا ف الوفا
مش طالب ف بردك
غير شوية دفا
3-5-2010

من نمرة الى شاه


دهشة من رتل حضورك
سيدي ف ذهابك أذي
و حضورك ونس
تل مريدينك كلهم ف الالوان
لون واحد
وانا الباقية انا النائية
انا المعزولة ف جزيرة
انا اللي زهقت من قوتي و قوتك
والوحيدة اللي اشتاقت وهي معاك
لطلتك
يا مليكي ف زمن تاه فيه الملوك
اتوحدت فيه المشاعر
انت اللي باقي من الزمن القديم
بصتك ليها معني
لمستك ليها معاني
وانا شاه يا سيدي
بين أيديك
تقدر تخون أو تبقي حنون
تقدر تريح بالي م الظنون
الصلاة وراك ف الصف عبادة
وحب النمرة القديمة مهواش عادة
يا مهووس الاسئلة و النظام
يا حكيم عرف الخير
اخيرا م الحرام
يا شاعر تايه ف البرية
بس باين لي ف الزحام
انا النمرة الموجعة
المؤلمة للأخرين إلاك
سيدي هتبتسم اما اقولك
اني مشتهياك
سيدي النمور لما تحب
زي الشاه تلين تدوب
تلطخ الشمس سماها
زي اوقات الغروب
مستحيل منك فكاك
مستحيل منك هروب
يا شيء صعب سهل مأمول
فيك انت الرجا
لنمرة كفت الرفض
وقلبها اجبرها ع القبول
سيدي لو انا طيف انت روح
لو انا شهد انت جنة للشهد
لو انا ورد انت بستان للورد
لو انا اي شيء
فانت المكمل للنمرة و الشاه
أنت المكمل للاشياء
فيك الرضا فيك القوة
والراحة بعد سفر طويل
فيك الوصول
قبلك جوايا كان مقفول
مكان مسحور
وحدك يا من جرأ ع الدخول
مخفتش من النمرة
الرابضة ع الابواب
مخفتش لو جت ساعة الحساب
مكنتش مدرك ان روحك طيبة
وليها تأثير
ع قلب النمرة الشرس العليل
وحدك من قرأ التراتيل
سمتني موحيتك
بس قبلي اسمحلي اقول
انت مشوفتش زيي قبل مني
يا غريب القول
انا نمرة اقود ولا اقاد
وشاه وقت اما اعوز
او انت تعوز
فيك الجنون و العقل
مع لمسة من الحكمة
فيك من كل ما عرفت صفات
فيك المكر و الدهاء
والغموض و الذكاء
فيك الملل بس فيك كمان الوفاء
سيدي س او كما اسميك
النمرة الشرسة تحبك
و الشاه الطيبة الوديعة
ترغب فيك
بدون مكر ولا التواء
صلاحي فيك
و ثوابي ليك
يا نقطة البداية للنمرة ف الوجع
ونقطة النهاية للشاه ف السلام
يا خيط ابيض مثير
يا غامض زي الاساطير
انا مبفكرش ف القوة ولا الملك ولا الجاه
حبيت بس اقولك عن النمرة
اللي بيك بقت شاه

27-4-2010

حدود احزان البشر


يا رب مبسألكش
عن سر الحياة
ولا العلم ومنتهاه
ولا عاوز اني ابقي حكيم
انا الفقير اليك وعبدك يا كريم
مبسألش عن الخلود
ولا عن الحكمة من الوجود
يا رب ان بسأل
عن النفس البشرية
المتمردة العصية
عن قوتها ف الاحتمال
يا رب حدك
ف حزن البشر
مالوش حدود
لأنه لو كان محدد
كان تبدد
يا رب انت اهل
الوصف الجميل
واحنا اصحاب القلب العليل
بأمرك تدلنا
وده كرم
حتى لو كان آلم
برضه كرم
يا رب
احزان البشر مالهاش تعداد
روحنا ضعيفة
وبتقبل القسمة
روحنا قدامك يا ربنا منكسرة
وبنتألم لأقل سبب
بس بقدرتك وبرحمتك
بنقدر نحتمل
و بنأتمل
يا رب ف الفرح حزن
وف الحزن حزن
و الحيرة حزن
و الوحدة حزن
و ف الكبر هم
و العجز غم
وكل المأسي ف النهاية بشًر
لأنها سعادة من ربنا
أحزاننا زي اليم
موجودة بدون زوال
ربنا اللي عالم بالاحوال
مش نفس الثناء
ومش نفس الجزاء
مش كلنا عبيد من ايام كربلاء
واحنا يا ربنا عاجزين عن الشكر
عاجزين عن الحمد
طيف نعمك علينا ف حزننا
منه الداء وهو الدواء
منه البشارة ف الابتلاء
حدود حزننا يا ربنا
مفيش ليها قيود
ورحمتك يا ربنا
على كل شيء بتسود
م عطية
19/4/2010

نفسي ف بلاد


نفسي ف بلاد
مفيهاش جمود
مفيهاش برود
ولا فيها تلمود ولا يهود
فيها رب واحد للعباد
مفيهاش سيد ولا عبيد
مفيهاش قسا و لا وعيد
قلوب اهلها مؤمنة و بجحة
اهلها ميكونش من الحرافيش
ميكونش حزنهم فرحة
لابسين فوق اجسامهم ريش
متلونين مماينين متعجبين ميتين
عاملين من فلوسهم سبحة
يسبحوا باسم سيدهم
وهو حى ويلعنوه ف الممات
ناس عاشقة حب السيطرة
عايشين حياتهم قنطرة
من البكا للهنا مقام
زي حد المسطرة
نفسي في ناس متكرهاش
الفؤاد لو هوي او بكي
نفسي في بلاد
مفيهاش شماتة ف القلوب
مبيكرهوش الشمس ف اوان الغروب
والضل ساعة الرحيل
والهداية من بعد الهروب
نفسي ف بلاد
نكون فيها بشر
مش نُساك
ولا فيها بشر مالكينا امتلاك
ولا يسألوا المدد
نفسي ف طوفان نفسي ف هلاك
يعدل الموازين
نفسي في بلاد تحب العدل
تحب الروح
مش حابين الالم كطريقة للكلام
والعدواة و الهوان
نفسي ف بلاد الجنين فيها ما اشتكي
و الضحك فيها مش زي البكا
يا بلاد قاسية مختلة الموازين
يا بلاد ناسية العدل عدل لمين
نفسي ف بلاد ممكنة فيها الحياة
ومن غير تاريخ ولا بداية
في الميعاد
نفسي ف بلاد فيها امان
فيها ونس فيها حنان
فيها ضي في العيون
من غير هوان
حتى لو كانت بلاد نوح
من بعد الطوفان
17/4/2010
في ذكري وفاة د.جمال حمدان

اشياء مستحيلة ف الطلب


انا شبه
كل العشاق العبيد
ف التاريخ
او ازيد
شبه كل السادة الكرام
شبه الاساطين ف الغرام
فيا من الفيافي و الدروب
فيا الشروق
فيا الغروب
فيا مملكة من السحر
مطلمسة بعود من الريحان و البخور
لا يبلي ولا يدوب
فيا كمان من الكلام
أجمله و اسحره
لمن يفهمه
فيا انا شبيه المتصوفة
واغاني البحارة ساعة التيه
وأهازيج اليهود ف الترحال
انا الصوف اللي من البرد يحمي
انا الزهر و الكستناء
انا الغموض
اللي في وصولك اليه كبرياء
متندهشيش
يا مقام ل طيف
مل الخلود
مل الجمود
كسر السدود
انا مش من قوم عاد ولا ثمود
ولا انا من اصحاب الاخدود
ولا انا من اللي كتبوا التاريخ بالبرود
انا من اصحاب الدعاء
وخفيت اليكي ف الزحام
واربت نفسي عن النداء
واليكي رفعت المظلمة
الكحل الاسود اللي ف العيون
فيه الف كلمة و مكلمة
فيه القلوب مسلمة
هو نفس النهج والاسلوب
ونفس الراحة
من بعد الهروب
فيكي شوفت
اللي باقي من العصور
اللي باقي من صحرا العرب
اللي باقي من بغداد
بعد دهس المغول
اللي باقي من الاندلس
بعد دق الطبول
اللي باقي من زرقاء اليمامة
بعد الرفض و بعد القبول
انا منتظر
كل مفاتيحي في ايديا
منتظرة ويايا
مدينتي مفيهاش غيري انا
ضلي ممتد من الارض للسما
تقبلي تبقيلي طيف
ف مملكتي
تزرعي فيها الونس
من غير حرس
يا كل الاشياء
المستحيلة ف الطلب
محمد ع
13/4/2010

ضحكتك


ضحكتك فيها دنيتك وخلاصي
فيها مني
اللي باقي منك
فيها نوع من الخضوع
واللذة من غير رجوع
وفيها طعم الحكمة
رومانسية على ضوء الشموع
نفس النوع
من غير اي تغيير
جواكي ليا نفس المصير
نفس الحروف
مع مش انها نفس الظروف
نفس الكلام
اللي بيكمل الكلام
هي الطلاسم اللي
ف السلام
ونفس لون الضحكة
متمردة وعصية
مجنونة بيكي وبيا
فيها من زمن الزمان
نفس الحنين والحنان
نفس العطش للارتوا
اللي ابتدا من حوا
وما انتهاش
فاكرينه انه ابتدا و انتهي
وهو عندك لسه ما ابتداش
لان اوانه لسه مجاش
لأمتي يا ست البنات
يا طيف من كل اللي فات
نفس الوعيد
بنفس نبرة التهديد
اني مقربش زي الفراشة لمعبدك
ف لحظة الانهيار
بس مين قالك
اني بخاف من النار
سميه وصول
سميه فتنة
سميه انبهار
انا زي الجيش المنهزم
لوحدي
من غير عرش ولا تيجان
من غير حرس ولا اموال
ماليش غير الفرار
وبرفض لان ف ضحكتك
بتختزلي الدنيا في ليل و نهار
في حروف كلمة نعم
ف حركة واحدة متأملة
حاملة كل معاني النغم
ضحكتك فيها الخلاص والاستمرار
9/4/2010
م ع

طيف ف نهاية يوم عابر


الغواية فن ف الدنيا
متوزع ف حناياكي
أقشر نفسي عن نفسي
واكونلك ف هداياكي
ف بحق كل الاطياف اللي حواليكي
والارواح الحايرة ف خطوط أيديكي
أعتقيني
وبلاش بصة الخنجر
بلاش حبسة شعرك الاسمر
كل الدلايل اليكي ف البلور مسلمة
عندك الحق و اليقين
ورجفة الخمر و لذته ف لون العين
جنة ونار يا ستنا حواليكي
ولاني طيف من الاطياف
داير في ملكوتك
ف لازم أني أنشد و أخاف
بنادي بعلو الصوت
أعتقينا و بلاش حبسة الجدران
بلاش تضلينا و بلاش كمان
تلعبي دور انك بتهدينا
يا هدم
يا سحر من عدم
يا غواية من ندم
لازم ما بينا سدود
وانا كنت ف الاخدود
وانتي ع العرش متزينة
مكرك هو اللي بيسود
اعتقينا
ما الرحمة كمان ليها مقدار
وكلنا أطياف ضلينا الدار
ف أيدينا شمع و خيوط الوان
ف عقولنا رموز
واحنا الحياري الاطياف الملاعين
بنعيش ف اليوم الالاف السنين
من الرحمة و الوفا محرومين
وف غوايتك رسم
أطيافنا أسم
كلامك قسم
يا ستنا ياللي غوايتك
بدون رادع ولا حساب دنيوي
حياتنا تجاهك شيء ساخر
جمالك ثبات
كلامك فيه الحياة والممات
وحدك بالغواية
وبمكرك تعيدي اللي فات
انا طيف مطيع
وصيف و مكلف اني اتبعك
رغم تقاليدك
ومراسم الغواية اللي بتتم ف صمت ماكر
نفس اللي حصل ف يوم عابر
ورغم ان اتباعك ف الشتات
الا انه لسه مقامك
بالمريدين عامر
3/4/2010

الأربعاء، 31 مارس 2010

حالة



الرؤية لسه مؤلمة
وكل الاشياء الممكنة
وكل حالات الكلام
والجرح اللي مالوش التئام
وكل اوجاع الهرب
حالة منك
مستعصية متمردة متفردة
ف الالم
ومن الالم
كل الجبال الساحرة
والوقفة الشاردة المؤلمة
اللي شالها عبير عيوني
نفس الحالة الفريدة
من الجمال
ولاني مش ولي
ولأنك واضحة ف مندلي
وماليش ضريح
يضمني
فالحب ف حالتك
بالعيون ديه ضياع لكن صريح
نفس التقاسيم المنمنمة
والكلمة اللي منك
بطلوع الروح الساحرة
الساخرة المسلمة
يا ام حالة من الدلال والتوهان
والراحة والوله
موعدتكيش اكونلك شباك
ف حياتك اللي مليانة شبابيك
ولا انا في الصفا ليكي بكونلك شريك
ولا انا عبد في معية حضرتك
بيخذلني ترددك
وبيقربني ليكي جحودك وتململك
صفات المكر اللي واضحة فيكي
ولأن كل الحالات عندي
انتي حالة واحدة مميزة
يألمني انك مش شيء من الاشياء
ولا انتي رجوع بعد الفراق
نفس وجع المنتظر
بابتسامة مش واضحة وبينة
وانتظار عارفة انتي نهايته ايه
اني ليكي وحدك انتي المصير
هو طريق العودة في وديانك
نفسه مفاتيح سجني ف احضانك
من غير ملل ولا خوف من الوجل
مع ثقتك العمياء انه هو انا
ده مش أمل
ب ابتسامتك الماكرة الحنينة
وحالتك الفريدة من النوع والتركيب
وبنفس معرفتك لضلالي وهدايتك
انت عارفة انه انا
هابقي بمعرفتك انتي
يا ستنا ليكي الحبيب
كل ده بحالة واحدة
وده الغريب !!!
محمد عطية
30/3/2010

السبت، 27 مارس 2010

بروفة ف العشق


انا يمكن أكون
شاعر لكن مجنون
يمكن أكون تجلي
أو اكون قاسي وجوايا حنون
جوايا ضلمة و نور
جوايا الوان من غير لون
كمان عندي تلت او آربع انواع
من الفوبيا ملهموش حل
من غيرهم صدقيني الميزان يختل
عندي فوبيا الحقيقة و الظنون
عندي خوف من المواجهة
خوف من الضياع
خوف من اللي اشتري
واكتر من اللي باع
عشان كده وصلت لحل
انا مضطر احبك كده
نفسي مع نفسي
مش لازم منك المعرفة
مش لازم منك الأمل
او اي شيء محتمل
صدقيني
لما تكون الرعشة طريقة للكلام
و الرجفة جوه القلب طريقة للسلام
والانطواء طريقة للحياة
ويتبقي ليكي مني كل اللي عني تاه
يبقي اللي باقي اني
اعشق البروفات
ما أملش من نفس الحركات
اكلمك بحساب اضحكك بحساب
احسسك بالجمال
بالمكر جوه العيون
من صدقي تحسبيه حقيقة
ولو كان خيال ولو كان ظنون
معنديش مانع افضل كده
ف بروفة ملهاش حد
ف عمر صامت محدود الملامح
حصاني جامح لكن لجامه انا
ولان النهاية قريبة
ف انا قطعت كل الورق
ونسيت كل شيء
ومكرك اللي ف العيون
و فكرتي عن الضلال
اللي اتمثلت فيكي مرايا ليا
بس جواها واحد غيري مشتيهكي
عشق فيكي الحنان عشق فيكي الالوان
وعشق ضلمتي و نورك
انا يمكن اكون انا
يمكن اكون تجلى
بس فيكي انتي المقام
فيكي التيه وسط الزحام
فيكي الممارسة للوصول
فيكي الرفض فيكي القبول
طبع الملايكة مش لايق عليا
وطبع القطط مش لايق عليكي
المعني ف حياتي بيكي مفيهوش تغيير
هو هو نفس الدور
صدقيني ان البروفة ف عشقك
مش محتاجة اي حضور
محمد عطية
25/3/2010

ديكور



جواك فضا عاتم
من غير ضي
وصحرا من غير حد
جنتك اللي انت مسميها
كلها اكلاشيهات
ف الحقيقة
لاجل ان انت تعرف
مفيش شيء بيندهش من لا شيء
ولا مكان مميز مالوش عنوان
تفصيل الحياة نفسها
بيدخل جواك
يلغبط تراكيبك المختلفة
يلغبطلك ديكور حياتك
الفاضي من حواليك
يمزعلك كل الحاجات
اللي كانت ليك
نزف الحنين المستمر
ولعك بالاشياء اللي فيها جحود
وكل مبرراتك التافهة
اللي مسميها ردود
التأمل المنافق
التذمر اللي نفسك انه يسود
الرفض للكائنات
اللطيفة الرزلة
اللي حواليك اللي مليانة جمود
المليانة حاجات بالعكس
الجميلة الغبية و المليانة برود
واللي قاسية بس بقلب طري
وعيون شفقانة على منظري
والكراكيب اللي مسميها
حاجاتك الشخصية اللي جواك بتسود
لما تفكر ف الديكور
تلاقي انك شيئ مفروض
على الحياة
تلاقي انك شيء مش انت مبتغاه
شيء مالوش حدود
يمكن تكون بدايته
بس استحالة تكون منتهاه
واسعة عليك الحياة
مش هو ده الديكور
اللي انت حابس نفسك
فيه وجواه و عليه
ليه مش مناسبك دلوقتي الدور
تلام الفضا
حواليك مالهاش اي لون
نفس الالوان اللي بيحبها غيرك
انت مبتحبهاش ليه الاصرار
انك تسمي الحاجات بغير اسمها
مين قال ان الحياة قاسية او صعبة
ومين قال انها تافهة او لعبة
الحياة حياة
من غير زيادة ولا نقصان
تل من القسا و الحنان
غدر و حيرة و سعادة ساعات
واوقات شوق وجمال و امتهان
ومين قال ان الديكور
ليه قيمة غيرك
ومين قال ان العبادة
بس ف الصلاة
العبادة كمان في انك تكون
بني ادم مش ديكور ف الفضا
محمد ع
18/3/2010

حياة سامأنة


رغم معرفتي بالفشل
الا انها حياتي
و لازم أعيشها
مش لازم تكوني أنتي
وحدك القصة
ومش لازم أكون آنا
نفس الانسان الحنون
الطيب الخجول المضطرب
اللي عيونه مدمعه
مش شرط أنى أكون آنا
عشان أعرفك
عشان الحياة تحبني تودني
وتبطل قسا
مش فارس مغوار
ولا انا مخلوق من نار
انا عادي و احساسي اعتيادي
فكرتي عن الحياة
زي فكرتك
احب اعيش ف الحياة
ومش شرط احلامي تبقي جنتك
ايامي فصوص
وقع منها ومني شوية
ندهتلها و رجعت
مطرح ما كانت
نمت حياة و روح وليدة
روح قلقانة سامأنة
مكسية و عريانة
شمعها وتره لحم
ونوره دم
احمر من الالوان
وردة وسط بستان
وسط آلوف
ومش باين ولا طايل
عاقل مش عبقري
بلاش انكماش ف الروح
كفاية عليا تسيطري
كفاية تخططي و تقدري
انتي النهاية والبداية
انتي المراية و الوله و الاشتياق
وسط الذكاء و الغباء
و الانبهار و الشعور بالخجل
امشي و اخطي ف وجل
كلك كسل و كسلك سم
مالوش ترياق
مالوش وفا
مالوش غيري واتنسي
مش انا اللي ارفض اعيش ف جفا
مهما زادت قسوتك
مهما دبلت محبتك
انتي هي وانا انا
لا عمرنا كنا في هنا
ولا عمرنا قولنا كأننا
و بتستمري و استمر
اعافرك و اسبك
اخونك و ادلك
وكتير بتذليني و مقدرش أذلك
بس هي هي النتايج
نفس النمط ف الحقايق
التفسير الوحيد ان انتي كده
وانا كده
يبقي ليه الملل
اللي مش محتمل
لازم قبول
أيه يعني نزغة جوه القلب وتعدي
أيه يعني كسرة نفس و تعدي
أيه يعني حزن و أندفن
أيه يعني كل شيء
ما كل شيء بيستمر
و بتستمري و أستمر
أبطل اسئلة
مش مستني جواب
مش مستنة فتحة باب
ولا مستني منك اي ترحاب
هو قدر
اعتباره بيكمن في اني معرفوش
شوفتك اه بس مشوفتوش
فبرغم السئم
والدلايل علي النهاية اللي قربت
وانفراجة الحلقة اللي طبطبت
اللي استنيتها عمر
بس صدقيني مكانش مر
أزعلك أفرحلك
انا بقول الصدق
الحقيقة ف كلامي
أنك فاهماني على العموم
مهما تزيد الهموم
رغم الغيوم و البرد
و الظلام و النور
انا مش هاكونلك مرتبك
محمد عطية
14/3/2010

اتفاق



أحنا اتفقنا على العمي
منشوفش ف بعض
اي شيء جميل
نعرف بعض من غير دليل
بس انتي نقضتي الاتفاق
وعشقتي دورك ف النفاق
وانا اللي مليش ف الوفا
واللي عمره ما طلب الدفا
صنته و ابتسمت لأني عشت دور الامير
وضحكت اكتر ما بكيت
وشربت ياما وما ارتويت
ضحكت على اللي
اتفقوا ع العمي
وهما ف نفس الطريق
طريق أحنا الاتنين نعرفه
بس قوليلي فين تقوتك
اللي ابتدت ف اول المشوار
فين لهجتك
فين موتك
اللي ف القرب مني سمتيه انتحار
اتفاقنا كان واضح وليه معالم
كان ليه شروط
ومدة ووقت
بيزيد لما بيقل
وساعات كتير بيذل
مش نفاق مش فراق
ولا وصل و وصال
اتفاقنا كان كارثة
وفراقنا صعب و مستحيل
شيء ف مظهره جميل
بس انتي اللي خالفتي الوفا
وانا مستاهلش
منك او من غيرك
انتي اللي شوفتيني انسان
وانا مش كده وشوفتي ليه كده ؟
شوفتي فيا عقل
شوفتي فيا قلب
شوفتي فيا حنان
وجنون وحكمة ودلع
ولو بس انتي من الاول
خونتي الاتفاق
و لأننا مش زي بعض
مش قد بعض
تراكيبنا مختلفة
احاسيسنا مختلفة
وف فرق كبير ف التعبير
عشان كده موصلناش لطريقة ف الكلام
كان السكوت هو سيد كل شيء
بعده كان الملل
قوليلي جربتي شعور بالرفض ؟
انا جربته
جربتي الغصة ف الحلق
جربتي العما وسط النهار
انا كنت شايف صحيح
كل الكلام كان صحيح
وانا اصريت اني مشوفش
عشان متهانش اكتر من كده
مكنتش اعرف
ان اللي يقبل الاهانة ف البداية
حياته بتنزف منه
زي السبحة حباية حباية
ميتبقلوش شيء كفاية
حتى لو كان عقيق او زمرد
مبقتش تفرق الاشياء
ومصيرك تشوف غيرها
الوعد مكتوب و صادق
عرفتي ليه انا مصر
على الاتفاق
من جديد
عشان جربت الهدد
ومحبتوش
جربت القسا
وبسببه حبيت كتير العما
يبقالي اتفاق
3/3/2010
م.ع

الخميس، 25 فبراير 2010

جمال الغجر


موسيقي تكوينك
جوايا تحييني
انفلاتك من جمالك
ف تفانين دلالك
وروحك محاصرة شيء جميل
متفردة انتي
زي الرصاص
زي الخلاص
قدامك انا هش و سعيد
قدامك انا واحد من العبيد
عيونك بتسرح جوايا
تكسر ف قلبي مطرح ما تمر
ولا عمري كنت مر
عاملك قلبي ليكي رحايا
عشانك عاملك ف قلبي تنايا
عشان حنانك جواها يمر
انكسر وتلصميني حتت
تشوفيها بيها عيونك
جوايا شيء مقسوم ليا اشوفه
جواكي شيء مقسوم ليا اعوزه
يا ام التراتيل بتحكى
و تروي وتكتب وتنده
وتسكت و اكتب
اشد الرحال وراكي
فين ما تكوني اكون
حقيقتك خيالي
كياني ظنون
تخنوني ما اخون
لانك من الغجر
والطبع من اللحم
احمر عروقه بتنفض
تحب الحياة
ترتوي و ارتوي
اعطش و اكون
جمالك بيسحر
بيأمر و بينهي
وعليا اني اطيع
جمالك بديع
ومسألش ليه يا ربي
خلقني بحبك خلقني اطيع
و انتي الوحيدة اللي معاها بضيع
محمد عطية
26*2*2010

الجمعة، 19 فبراير 2010

شيء بسيط مختلف


نفس لون العيون
نفس لون الفستان
نفس البياض اللي ف الايدين
نفس السهتنة و طريقة الكلام
اللي شد قلبي ليكي
انك بعيدة عن النجوم و قريبة
انك مملة جداً اوي
بس طيبة
اني حبيتك حب اللمم
حب النور حب الفراشة للهلاك
حب الملاك للملاك
كل التفاصيل نفسها بتكرر نفسها
ف اخر لقا
نفس التعبير البارد
الخالي من التجاويف
اللي زي شيء مخيف
واتقال و بنفس الدلال
بنفس المحبة و الجمال
وهو جوايا خيال
وبنفس البساطة ف التعابير
اني مش شايف اي شيء مثير
ونفسها هي النظرات
اللي من تحت لتحت
أكنه بروفايل جانبي
وصورتك شايفها قدامي
عاشقة الحيا و السما
و الصمت وقت اللقا
والتنهيدة مع طول رموشك
مستبعدة ومحددة المواضيع
الماضي كان و الحاضر كان وانولد
والمستقبل ليكي مع غيري
غير كل اللي كان
كل التفاضيل مدمجة
مرت ف شريط سريع
الحنان كان شيء بديع
مرت ف نفس اللحظة و الثانية
مفتكرش ان رؤياكي استمرت
مفتكرش اني فهمت انتي عاوزة ايه
بنفس اللمم
كأنك صنم
كأن ما بينا جبل و انهدم
كل الاشياء زي ما كانت
كل الاوصاف بالتمام
انتي انا
مفيش تغيير
الا انه كان في
شيء بسيط واحد
صغير مختلف
ان الحنين مبقاش حنين
ولون الدهب ف الدبلة
اللي ف ايديك اليمين
عدتي من جنبي
بنفس الارتباك
وضحكتي و ضحكت
لان الاشياء هي هي
نفسها
ماعدا
شيء بسيط مختلف
محمد عطية
17/02/2010

الاثنين، 15 فبراير 2010

دليل


برشدك من غير دليل

بيومض نوري من نورك

بنكوي بنار حضورك

بستلذ جوايا بغرورك

بحبسك جوايا طير

وأطلقه وقت ما تعوزي

أكونلك ساعات أمير

برشدك لمكاني

يألمني ألم ألمك قبل كده

عندي انتهي وعندك ابتدا

مكنش واضح دوري أيه

غيري اني ابقي ضوء

مخدتش بالي من الفروق

كان دوري انورلك الطريق

اكونلك واضح صريح

بساط مريح

انا الطريق و الوسيلة

والطير و القفص و الرفيق

انا السجان والمسجون

الاعمى اللي من غير عيون

برشدك انا اللي على البر

وانا الغريق

مكانك مكاني

سحري ف كلامي

مش بنتمي لأي شئ

غير اليكي

كل الحاجات ف الآخر

متجمعة بتساويكي

مش مندهش

مفيش وخز منك ف العيون

مفيش سحاب مفيش غيوم

مهما كان الطريق ولا الرفيق

ولا الحاجات السهلة ولا الصعب

دوري اني أبينلك أنورلك

أدلك على الحاجات اللي جوايا

منك ادلك وتعيشي بيا

ولو ترياقي من سمكِـ



محمد عطية

15/02/2010


الأحد، 14 فبراير 2010

طريقة مملة للحياة


نفس اللي حصل

بيحصل من جديد

هي هي نفس الوشوش

نفس اللي اتقال من قبل كده

نفس التلامة اللي في البني ادمين

نفس الضحك اللي من ورا القلوب

نفس المميزات ونفس العيوب

نفس الوان الخشب

نفس النفوس نفس الحطب

الجديد هو اللي هيحصل بكرة

ربما

بكره مش بعيد

احنا بنعيد

حياتنا دايرة ليها نقطة بداية واحدة

نقطة نهاية واحدة

نفس التلامس و العبوس

التلاقي ف نفس النقط

هي نفسها اماكن الخبطات

روحك اللي ف الجنبات

نفس الطريق نفس الصديق

حتى نفس نوع المطر

ونفس اوراق الشجر

اللون الازرق للسما

واللون الاسود للعما

نفس الحياة بنفس الملل

نفس الجبال نفس التلال

هو هو نفس الخلل

نفس العيب و نرجع نكرره

مينفعش انك تغيره

هو القدر و النصيب

محدش بيعرف الغيب

بس المشكلة انه بيكرر

نفسه ف نفس المنحنى


محمد عطية

13/2/2010

السبت، 13 فبراير 2010

شخص للبيع


من غير فلسفة ولا مقدمات

في شخص معروض للبيع

اعتبره حي حتى لو هو مات

يحب القديم ويحب الجديد

بس هو مش من العبيد

ولا عنده علامة

تميزه عند الوريد

البيع ف مزاد

لأنه ف حالة كساد

ووخم وانطواء

وبيحب يكتب شعر

ولأعلى سعر

ومن غير سمسرة

وبهدوء ومن غير شوشرة

الامانة ديه شعار

وهو ليه اعتبار

اما الصفات فمثقف و شاعر

وبياخد جوايز

قرأ كتير و أشتري

حياته حاليا منحنى

قرا ف الفلك و تاريخ من أمتلك

صفاته طويل حويط

يحافظ على الاسرار لطيف معشره

كأنه من التجار

يحفظ السر و يودك

حتى ولو انت دون

مالك حققلك الظنون

عاوزه يقول .... يبدع يقول

عاوزه يسكت ينخرس

هو للبيع لأعلى سعر

ومن غير فصال ولا وصال

وبضمان الادب و التربية

مع حقك ف المطالبة بالايصال

صوته واطي عند اللزوم

ملاك لو انت عاوز كده

وشيطان لو حابب انت كده

يتلون و يحبك

يمدحك و ف سره يلعنك

مع امكانية انك تشكله

وكل ده و بالسعر الحقيقي

عرض و ياريت تلحقه

صدقوني انا للبيع

بس المهم انتو تصدقوا

محمد عطية

11/2/2010

الخميس، 11 فبراير 2010

المعرض من جديد 2010




by Mohamed Ateaa on Thursday, February 11, 2010 at 1:41am ·
الاماكن و اسماء الكتب
*
مكتبة الاسرة
-
بيتر بنشلي ، الجزيرة
-
محمد عمارة ، رسائل العدل و التوحيد ، مجلدان في كتاب واحد
-
ابو حامد الغزالي ، فضائح الباطنية
-
تيد انتون ، العلم الجسور سبعة علماء يغيرون عالمنا
-
وائل غالي ، تاريخ العلوم العربية (ارهقني حمله)فعلا
-
عبد الرحمن الابنودي ، مختارات من الاعمال
-
ابن ابراهيم الغرناطي ، الاعتصام
-
السيد ياسين ، اعادة اختراع السياسة من الحداثة الي العولمة
-
يوسف القعيد ، قطار الصعيد
-
علاء الديب ، وقفة قبل المنحدر
-
بهاء طاهر ، نقطة النور
-
ابراهيم اصلان ، خلوة الغلبان
-
ماجد يوسف ، رباعية القاهرة
*
مكتبة مصر
-
مختصر كتاب كليلة ودمنة بسعر 5ج
-
القصص للحكيم ايسوب بسعر 2ج (رائع) جدا
-
الامام ابي حامد الغزالي ، احياء علوم الدين ، 5 مجلدات بسعر 35ج الشكر لاحمد الديب جدا
*
دار اخبار اليوم
-
موسوعة الامثال العامية
*
الهيئة العامة
-
فورستر ، اركان القصة
-
فوزي فهمي ، تخريب العالم
-
كانط ، مشروع للسلام الدائم
-
سويف ابو ريه ، تل الهوي
*
دار الهلال
-
خيري شلبي ، كتب وناس
-
رضوي عاشور ، اطياف
-
حمدي البطران ، خريف الجنرال
-
خيري شلبي ، صهاريج اللؤلؤ
-
مريد البرغوثي ، رايت رام الله
-
محمد المنسي قنديل ، قمر على سمرقند
-
يوسف زيدان ، ظل الافعي
-
اميل حبيبي ، الوقائع الغريبة في اختفاء سعيد ابي النحس المتشائل
-
محمد عفيفي ، ترانيم في ظل تمارا
-
جمال الغيطاني ، نوافذ النوافذ
-
علاء الديب ، عيون البنفسج
-
باولو كويليو ، السيميائي ساحر الصحراء
تعطي دار الهلال خصم قيمته 20% ومبتاخدش فيزا
انتهي